سڈنی (این این آئی) پاکستان کرکٹ ٹیم کے لیگ اسپنر یاسر شاہ نے میلبرن میں باکسنگ ڈے ٹیسٹ میں خراب باؤلنگ کی ذمہ داری قبول کرتے ہوئے کہا کہ انھوں نے غلط جگہ باولنگ کی اور اپنی باؤلنگ میں فیلڈنگ کی تعیناتی کا فیصلہ میرا ذاتی تھا۔یاسر شاہ نے آسٹریلیا کے خلاف باکسنگ ڈے ٹیسٹ میں ناقص کارکردگی کا مظاہرہ کرتے ہوئے ایک اننگز میں 207 رنز دیے تھے اور صرف تین وکٹیں حاصل کرسکے تھے۔
رپورٹ کے مطابق یاسر شاہ نے غیرملکی نشریاتی ادارے کو ایک انٹرویو میں کہا کہ یہ میری غلطی تھی اور بطور باؤلر میں اپنی باؤلنگ کے دوران فیلڈرز کی تعیناتی کی ذمہ داری قبول کرتا ہوں جو غلط فیصلہ تھا۔انہوںنے کہاکہ میرا خیال ہے میں نے بہت زیادہ فل ٹاس اور آسان گیندیں کیں تاہم میں نیٹ پر اپنے ایکشن کو بہتر کرنے اور باؤلنگ کی سمت کو درست کرنے کیلئے کام کررہا ہوں۔
باکسنگ ڈے ٹیسٹ کے حوالے سے انہوںنے کہاکہ میلبرن کرکٹ گراؤنڈ میں بارش کے باعث کوئی خشکی نہیں تھی اور وکٹ بھی زیادہ خراب نہیں تھی۔شین وارن کے مشوروں پر یاسر شاہ نے کہا کہ وہ ہمیشہ مجھے تحمل کے ساتھ وکٹیں حاصل کرنے کا گر بتاتے ہیں اور یہ بتایا کہ مجھے آسٹریلیا میں سلو باؤلنگ کیسے کرنی ہے اور متحدہ عرب امارات میں 83-84 کی رفتار سے کس طرح باؤلنگ کرسکتا ہوں۔

موضوعات:یاسر شاہ