لاہور (این این آئی)قومی کرکٹ ٹیم کے فاسٹ باؤلر محمد عامر نے کہا ہے کہ ہر کھلاڑی کا خواب ہوتا ہے کہ وہ لارڈز میں کھیلے ۔ محمد عامر نے پاکستان کرکٹ ٹیم کے فیس بک صفحے کیلئے ایک ویڈیو انٹرویو میں چند دلچسپ سوالوں کے جوابات دئیے۔محمد عامر نے اپنے انٹرویو میں کہا کہ مجھے کرکٹ میں واپسی کیے ہوئے ایک سال ہوا ہے تاہم شین واٹسن مجھے ہمشیہ مشکل بلے باز لگتے تھے۔
بلے بازی کیلئے مچل اسٹارک کا سامنا کرنے میں مزہ آتا ہے ٗ لارڈز اور میلبورن کرکٹ گراؤنڈ کی وکٹ ان کی فیورٹ وکٹ ہے۔2009 کا ایک واقعہ بتاتے ہوئے کہا کہ جب ہم آسٹریلیا آئے تھے تو رکی پونٹنگ صفر پر کھیل رہے تھے اسی دوران میں نے ان کا کیچ گرادیا تھا جس کے بعد انھوں نے 200 رنز کی اننگز کھیلی تھی جو ہمیں مہنگا پڑا تھا یہ کیچ ایسا ہے جس کے حوالے سے میں کہتا ہوں کہ نہ چھوٹتا۔محمد عامر کو کرکٹ کے علاوہ فٹ بال پسند ہے جبکہ جم میں ان کے بہترین ساتھیوں میں شان مسعود اور عمر امین ہیں۔جب ان سے سوال کیا گیا کہ لارڈز میں میچ یا مالدیپ میں ہنی مون منانے کو موقع دیا جائے تو کس کا انتخاب کریں گے جس پر ان کا کہنا تھا کہ لارڈز میں کھیلنا ہر کھلاڑی کا خواب ہوتا ہے تو میں لارڈز میں میچ کھیلنا پسند کروں گا۔
محمد عامر نے 2010 میں اپنا آخری ٹیسٹ میچ لارڈز میں کھیلا تھا جبکہ 6 سالہ بعد ٹیسٹ میں واپسی بھی اسی گراؤنڈ میں کی تھی اور اسی گراؤنڈ میں 2010 میں کھیلے گئے ٹیسٹ کی ایک اننگز میں 6 وکٹیں حاصل کی تھیں جو ان کی بہترین کارکردگی ہے۔

موضوعات:محمد عامر