اسلام آباد ( مانیٹرنگ ڈیسک)پاکستان کے سابق کپتان اور مایہ ناز بلے باز شاہد آفریدی نے پاکستان میں نوجوان ٹیلنٹ کو پروان چڑھانے کیلئے پاکستان سپر لیگ کی فرنچائز پشاور زلمی کے زیر اہتمام عالمی معیار کا ٹورنامنٹ منعقد کرانے کا اعلان کیا ہے۔مایہ ناز جارح مزاج بلے باز شاہد آفریدی نے سماجی رابطوں کی ویب سائٹ ٹوئٹر پر اپنے پیغام میں کہا کہ میں زلمی ورلڈ کپ کا اعلان کرنے پر انتہائی فخر محسوس کررہا ہوں، یہ پاکستان کی تاریخ میں پہلی مرتبہ ہو گا کہ جہاں باصلاحیت کھلاڑیوں منظر عام پر لانے کیلئے انٹرنیشنل پلیٹ فارم فراہم کیا جائے گا۔
پاکستان سپر لیگ کی فرنچائز پشاور زلمی کے اس اقدام کا مقصد پاکستان اور بیرون ملک موجود نوجوان کھلاڑیوں کو عالمی سطح پر کھیلنے کے مواقع فراہم کر کے ان کے ٹیلنٹ کو نکھارنا ہے۔اس ایونٹ میں دنیا کے دس ممالک کے کلب شرکت کریں گے جن سے پشاور زلمی نے شراکت داری کی تھی اور باہمی مقابلے کے بعد فاتح کا فیصلہ ہو گا۔ایونٹ میں پاکستان سمیت جنوبی افریقہ، آسٹریلیا، انگلینڈ، قطر، سعودی عرب، بحرین سمیت دنیا کے دیگر ملکوں کی کلب ٹیمیں شرکت کریں گی۔رواں ماہ کے اوائل میں پشاور زلمی کے مالک جاوید آفریدی نے اپنی ٹوئٹ میں متحدہ عرب امارات میں چیمپیئن شپ کرانے کا اعلان کیا تھا۔پاکستان سپر لیگ کے معروف ترین فرنچائز میں سے ایک پشاور زلمی نے لیگ کے پہلے ایڈیشن میں اچھے کھیل کا مظاہرہ کیا تھا لیکن وہ کوئٹہ گلیڈی ایٹرز کے ہاتھوں شکست کھا کر ایونٹ سے باہر ہو گئے تھے۔حال ہی ہونے والی ڈرافٹ کی تقریب میں سابق ویسٹ انڈین کپتان ڈیرن سیمی کو پشاور زلمی کا کپتان مقرر کرنے کا اعلان کیا گیا تھا۔
