نئی دہلی(مانیٹرنگ ڈیسک) بھارتی کرکٹ بورڈ کے صدر انوراگ ٹھاکر نے کہا کہ ہمیں خوشی ہے کہ ہاک آئی نے ہماری تمام سفارشات پر عمل کیا ہے۔ ہم نے فیصلہ کیا ہے کہ ڈی آر ایس سسٹم کو تجرباتی بنیادوں پر انگلینڈ کے خلاف سیریز میں استعمال کیا جائے گا۔ تاہم اس کا استعمال جاری رکھنے کا فیصلہ ڈی آر ایس کی کارکردگی اور اس سے ملنے والے ردعمل کی بنیاد پر کیا جائے گا۔ایک غیر ملکی خبر رساں ادارے کے مطابق بھارتی ٹیسٹ کپتان ویرات کوہلی نے ڈی آر ایس کے استعمال کی حمایت کی تھی جس پر بی سی سی آئی نے لچک دکھاتے ہوئے تجرباتی بنیادوں پر اسے استعمال کرنے کا اعلان کیا۔ تاہم اس سے قبل مہندر سنگھ دھونی اس سسٹم کے سخت مخالف تھے۔ دھونی کا کہنا تھا کہ ڈی آر ایس کا استعمال اسی وقت کیا جا سکتا ہے جب یہ 100 فیصد درست ہو۔ واضح رہے کہ بھارت کا ڈی آر ایس پر سب سے بڑا اعتراض یہ تھا کہ گیند پیڈ پر لگنے کے بعد صحیح راہ متعین نہیں کر پاتی جس کی وجہ سے ریویو ضائع ہونے کا خطرہ ہوتا ہے لیکن الٹرا موشن کیمرہ کے استعمال کی بدولت اس خامی پر کافی حد تک قابو پا لیا گیا ہےجس کےبعد بھارت نے آمادگی ظاہرکردی ہے ۔