لاہور(آئی این پی)قومی ٹیم کے کپتان کو پاسپورٹ نہ ملا، کپتان کے بغیر ہی میدان میں پہنچ گئی،پاکستان ہاکی ٹیم ایشیئن چیمپئنز ٹرافی کے لئے ملائیشیا پہنچ گئی لیکن پاسپورٹ نہ ہونے پر کپتان پاکستان میں ہی رہ گئے، ٹیم میں متبادل کھلاڑی شامل کئے جانے کا امکان ہے۔تفصیلات کے مطابق پاکستان ہاکی ٹیم نے کپتان کے بغیر ہی ایشیئن چیمپئنز ٹرافی میں شرکت کے لئے ملائیشیا میں ڈیرے ڈال لئے۔ کپتان محمد عرفان نے برطانوی ویزے کیلئے برطانوی سفارتخانے کو پاسپورٹ جمع کرایا تھا جو تاحال ان کو برطانوی سفارتخانے سے واپس نہیں مل سکا۔ پاسپورٹ کے حصول کے لئے کپتان محمد عرفان نے اسلام آباد میں سفارتخانے کے کئی چکر بھی لگائے۔پاکستان ہاکی فیڈریشن کے سیکرٹری شہباز سینئر کا کہنا ہے کہ معاملہ بدھ کو بھی حل نہ ہوا تو متبادل کھلاڑی شامل کیا جائے گا جبکہ کپتان کا انتخاب کرنا ٹیم مینجمنٹ کا کام ہے۔ پاکستان ہاکی ٹیم ایشیئن چیمپئنز ٹرافی میں جمعرات کو ملائیشیا کیخلاف پہلا میچ کھیلے گی۔

موضوعات:ہاکی ٹیم کپتان