اسلام آباد (نیوز ڈیسک) پاکستانی نژاد پی او سی ہولڈرز کے لیے حج کی راہ ہموار، پہلی بار پاکستانی کوٹے میں شامل کرنے کی اجازت

سعودی عرب نے پاکستان اوریجن کارڈ (POC) رکھنے والے پاکستانی نژاد افراد کو پہلی مرتبہ پاکستان کے حج کوٹے میں شامل کرنے کی منظوری دے دی ہے۔وزارتِ مذہبی امور کے مطابق مجموعی پاکستانی حج کوٹے کا ایک فیصد پی او سی کارڈ ہولڈرز کے لیے مختص کیا جائے گا، جس کے تحت تقریباً 1,792 پاکستانی نژاد افراد پاکستان کے کوٹے کے تحت حج کی سعادت حاصل کرسکیں گے۔نئی پالیسی کے تحت پی او سی رکھنے والے افراد سرکاری اور نجی دونوں حج اسکیموں میں درخواست دینے کے اہل ہوں گے۔ یہ فیصلہ ان افراد کے لیے خصوصی اہمیت رکھتا ہے جنہوں نے ماضی میں پاکستانی شہریت یا پاسپورٹ ترک کردیا تھا۔وزارت کے مطابق پی او سی کارڈ رکھنے والے درخواست گزاروں کو حج ویزا جاری کرنے کے لیے یہ ضروری ہوگا کہ سعودی عرب کی جانب سے ویزا کے اجرا میں کوئی قانونی یا انتظامی رکاوٹ موجود نہ ہو۔

حکام کا کہنا ہے کہ پی او سی ہولڈرز کے لیے حج درخواستوں، اہلیت اور دیگر شرائط سے متعلق تفصیلی معلومات وزارتِ مذہبی امور کی ویب سائٹ پر فراہم کی جائیں گی۔ درخواست فارم میں سعودی وزارتِ حج کی جانب سے مقرر کردہ تقاضوں کو بھی شامل کیا جائے گا۔وزارتِ مذہبی امور نے متعلقہ اداروں کو نئی سہولت کے بارے میں آگاہی فراہم کرنے کی ہدایت بھی جاری کردی ہے تاکہ اہل پاکستانی نژاد افراد اس موقع سے فائدہ اٹھا سکیں۔واضح رہے کہ پاکستان اوریجن کارڈ (POC) ایسے غیر ملکی شہریوں کو جاری کیا جاتا ہے جن کا پاکستانی پس منظر ہو یا جو ماضی میں پاکستانی شہری رہ چکے ہوں۔ نئی پالیسی کے بعد ایسے افراد کو پہلی بار پاکستان کے حج کوٹے کے ذریعے فریضہ حج ادا کرنے کا موقع ملے گا۔