اسلام آباد(نوز ڈیسک) ذرائع کے مطابق جنوری سے مارچ 2026 کی سہ ماہی ایڈجسٹمنٹ کے تحت صارفین کو دیا جانے والا 67 ارب 17 کروڑ روپے سے زائد کا مالی ریلیف رواں ماہ ختم ہوجائے گا،
جس کے بعد ستمبر سے بجلی کے بلوں پر اضافی بوجھ پڑنے کا امکان ہے۔دوسری جانب بجلی کی تقسیم کار کمپنیوں نے اپریل سے جون 2026 کی سہ ماہی ایڈجسٹمنٹ کے تحت صارفین سے 23 ارب روپے سے زائد وصول کرنے کی درخواست نیشنل الیکٹرک پاور ریگولیٹری اتھارٹی (نیپرا) کو دے دی ہے۔ اس ایڈجسٹمنٹ کی منظوری کی صورت میں بجلی صارفین سے تقریباً ایک روپے فی یونٹ اضافی وصول کیے جانے کا امکان ہے، تاہم حتمی رقم نیپرا کی سماعت اور فیصلے کے بعد طے ہوگی۔علاوہ ازیں نیپرا نے جون 2026 کی ماہانہ فیول کاسٹ ایڈجسٹمنٹ کی مد میں بجلی کی قیمت میں 75 پیسے فی یونٹ اضافے کی منظوری بھی دے دی ہے۔
یہ اضافی رقم اگست کے بجلی کے بلوں میں کے الیکٹرک سمیت ملک کی تمام ڈسکوز کے صارفین سے وصول کی جائے گی۔تاہم 75 پیسے فی یونٹ کا یہ اضافہ لائف لائن صارفین، الیکٹرک وہیکل چارجنگ اسٹیشنز اور پری پیڈ میٹر استعمال کرنے والے صارفین پر لاگو نہیں ہوگا۔
