نئی دہلی(این این آئی) انٹرنیشنل کبڈی فیڈریشن (آئی کے ایف) نے رواں ہفتے بھارت کے مغربی شہر احمدآباد میں ہونے والے کبڈی ورلڈ کپ میں پاکستان کو شرکت سے روک دیا۔غیر ملکی میڈیا کے مطابق انٹرنیشنل کبڈی فیڈریشن (آئی کے ایف) کے سربراہ دیوراج چترویدی جن کا تعلق بھارت سے ہے، نے کہا کہ دو جوہری ریاستوں کے درمیان حالیہ کشیدگی کے باعث پاکستان کو ورلڈ کپ میں شرکت سے روک دیا گیا ہے۔ٹورنامنٹ میں بھارت ، ایران، امریکا، آسٹریلیا،جنوبی افریقا، انگلینڈ، پولینڈ، کینیا اور ارجنٹینا کی ٹیمیں حصہ لے رہی ہیں۔چترویدی نے بتایاکہ بھارت میں پاکستان کے کھیلنے کیلئے یہ مناسب وقت نہیں ہے۔انہوں نے کہاکہ پاکستان انٹرنیشنل کبڈی فیڈریشن کا ایک قابل قدر رکن ہے تاہم موجودہ صورتحال کو دیکھتے ہوئے اور دونوں قوموں کے بہتر مفاد میں ہم نے یہ فیصلہ کیا ہے پاکستان کو اس چمپئن شپ سے باہر رکھا جائے۔دوسری جانب پاکستان نے انٹرنیشنل کبڈی فیڈریشن پر غیر منصفانہ سلوک کا الزام عائد کرتے ہوئے کہا کہ اگر یہ فیصلہ سیکیورٹی خدشات کے تحت ہی کیا گیا تو دونوں حریف ممالک کو ایونٹ سے باہر کیا جانا چاہیے۔پاکستان کبڈی فیڈریشن کے سیکرٹری رانا محمد سرور نے بتایاکہ ہم نے اس مسئلے پر بات کرنے کیلئے ایک اجلاس بلوایا ہے تاہم ایک بات واضح ہے کہ پاکستان کے بغیر کبڈی ورلڈ کپ، ورلڈ کپ نہیں ہوگا۔انھوں نے کہاکہ یہ ایسے ہی ہے جیسے برازیل کے بغیر فٹبال ورلڈ کپ کا انعقاد کیا جائے۔دوسری جانب پاکستان کبڈی ٹیم کے کپتان ناصر علی نے بتایا کہ ان کے کھلاڑی اس وقت بہتر فارم میں ہیں جنھوں نے رواں برس مئی میں پاکستان میں ہونے والے 6 ملکی کبڈی کپ میں بھارت کو شکست دی اور گذشت ماہ ویتنام میں ہونے والے ایشین بیچ گیمز میں بھی بھارت کو شکست دے کر پہلی مرتبہ سونے کا تمغہ جیتنے کا اعزاز حاصل کیا۔انہوں نے کہاکہ ہم بھارت میں ہونے والے ورلڈ کپ میں انڈیا کو شکست دینے کے حوالے سے پرامید تھے۔

موضوعات:کبڈی ورلڈ کپ