برمنگھم (این این آئی)پاکستانی بلے باز اظہر علی نے کہا ہے کہ سمیع اسلم کو رن آؤٹ کر وانے کا دکھ ہے ۔ایک انٹرویومیں انہوں نے کہاکہ وہ نوجوان کھلاڑی ہیں تاہم جس طرح سے انھوں نے بیٹنگ کی اسے دیکھنا بہت زبردست تھا۔ بدقسمتی سے میں نے انھیں رن آؤٹ کروا دیا ٗیہ ایک اور بوجھ تھا جو مجھے اپنی اننگز میں برداشت کرنا پڑا ٗیہ بائیں ہاتھ سے بلے بازی کرنے والے 20 سالہ سمیع اسلم کا دوسرا ٹیسٹ میچ ہے جنھیں پہلے دو میچوں میں ناکام ہونے والے شان مسعود پر ترجیح دے کر اس میچ میں شامل کیا گیا تھا۔انھوں نے اس موقع کا بھرپور فائدہ اٹھاتے ہوئے 176 گیندوں پر 82 رنز کی نپی تلی اننگز کھیلی تاہم اظہر علی نے ایک گیند پوائنٹ کی جانب کھیل کر سمیع اسلم کو رن بنانے کی کال دی حالانکہ وہاں رن بنانے کا موقع نہیں تھا۔ سمیع نے کوشش کی تاہم ونس کی عمدہ تھرو سیدھی وکٹوں کو جا لگی اور سمیع خاصے فاصلے سے رن آؤٹ ہو گئے۔اگر وہ یہ سنچری سکور کر لیتے تو وہ انگلستان میں سنچری بنانے والے کم عمر ترین اوپنر بن جاتے۔اظہر علی نے کہا کہ جب وہ آؤٹ ہوئے تو ہم دونوں بڑا اچھا کھیل رہے تھے اور ہمارے پاس مزید لمبی اننگز جاری رکھنے کا موقع تھا ایسی چیزیں ہو جاتی ہیں تاہم مجھے اس لیے زیادہ دکھ ہے کہ وہ نوجوان کھلاڑی ہیں، اور سنچری بنانے کے بہت قریب پہنچ گئے تھے انہوں نے کہاکہ میں نے پوری کوشش کی اور میرا خیال ہے کہ سمیع اسلم نے بھی بہت اچھی اننگز کھیلی جس کا مجھے بھی بہت فائدہ ہوا ۔ایک سوال پر انھوں نے کہاکہ آخری گیند پر آؤٹ ہو جانا میرے لیے بہت مایوس کن تھا، لیکن پھر بھی ملک سے باہر سکور کرنا ہمیشہ خوش گوار ہوتا ہے۔انہوں نے کہاکہ اگر میں ناٹ آؤٹ واپس آتا تو اچھا ہوتا اور صرف دو کھلاڑی آؤٹ ہونے پر ٹیم کو نفسیاتی فائدہ ہوتا تاہم بدقسمتی سے ایسا نہ ہو سکا۔