لندن(این این آئی)سری لنکا کرکٹ ٹیم کے مایہ ناز اسپنر رنگنا ہیراتھ نے کہاہے کہ پاکستانی لیگ اسپنر یاسر شاہ ان تمام صلاحیتوں کے مالک ہیں جس کی ضرورت ایک اچھے باؤلرکو ہوتی ہے اور انگلینڈ میں بہت وکٹیں حاصل کریں گے۔ایک انٹرویو میں رنگنا ہیراتھ نے قومی ٹیم کے لیگ اسپنر کی صلاحیتوں کی تعریف کرتے ہوئے کہا کہ یاسر شاہ پاکستان کے لیے بہت اچھا انتخاب ہیں، ان کی باؤلنگ میں کئی پہلو ہیں، گیند کو گھمانے، باؤنس اور خاص صلاحیت یہ ہے کہ خراب گیندیں بہت کم کراتے ہیں۔انہوں نے کہاکہ بطور باؤلر یاسرشاہ کے پاس سب کچھ ہے ٗانھوں نے صرف 12 ٹیسٹ کھیلے ہیں اور 70 سے زائد وکٹیں حاصل کرچکے ہیں جس سے ہمیں اندازہ ہوتا ہے کہ وہ کتنے اچھے باؤلر ہیں ٗیاسر شاہ نے متحدہ عرب امارات میں انگلینڈ کے خلاف شاندار کارکردگی کا مظاہرہ کیا تھا جہاں وکٹ ان کیلئے ساز گار تھی تاہم ہیراتھ کو یقین ہے کہ یاسر شاہ انگلینڈ میں بھی بہت وکٹیں حاصل کریں گے۔سری لنکن باؤلر نے کہا کہ انگلینڈ میں انھیں تحمل سے باؤلنگ کرنے کی ضرورت ہے اور مجھے یقین ہے کہ وہ بہت وکٹیں حاصل کریں گے۔ہیراتھ کے مطابق مصباح الحق اور یونس خان دو ایسے تجربہ کار کھلاڑی ہیں جو کسی بھی کنڈیشن پر کھیل سکتے ہیں، دونوں کو پوری دنیا میں کھیلنا کا تجربہ ہے اس لیے مجھے یقین ہے انگلینڈ میں بھی یہ کامیاب ہوں گے۔غیر ملکی کوچ کے حوالے سے انہوں نے کہاکہ مجھے غیرملکی اور مقامی کوچ کے درمیان کوئی فرق نظر نہیں آتا اصل کام ہمیں اعتماد دینے اور تکنیکی اعتبار سے اچھی باتیں بتانا ہے جو کوئی بھی کوچ کرے وہ اچھا ہے۔