لاہور،لندن (آن لائن)پنجاب کی وزارت کھیل کی جانب سے بیلجیئم کی جعلی کرکٹ ٹیم کے دورہ پاکستان پر قومی خزانے سے رقم لٹانے کا انکشاف ہوا ہے۔ پاکستان مسلم لیگ (ن) برطانیہ سے تعلق رکھنے والی بعض شخصیات نے بیلجیئم کی جعلی کرکٹ ٹیم کا دورہ پاکستان ارینج کیا اور صوبائی وزیر کھیل رانا مشہود سے تعلقات کی بناء4 پر اس دورے پر آنے والے اخراجات بھی وصول کیے۔ میڈیا رپورٹس کے مطابق 3سال پہلے لندن سے تعلق رکھنے والے 3افراد نے 15کھلاڑیوں پر مشتمل ٹیم تشکیل دی اور انہیں برطانوی کرکٹ ٹیم کی کٹس پہنا کر پاکستان لائے جہاں انہوں نے یوتھ فیسٹیول میں شرکت کی حیران کن طور پر ان کھلاڑیوں میں سے صرف 2کا تعلق برطانیہ سے تھا جبکہ باقی لاہور اور اسکے گردو نواح سے تعلق رکھتے تھے۔ان آرگنائزر کی جانب سے اس ٹیم کو لندن سے لاہور لانے اور انکے سامان اور بورڈنگ کا خرچہ قومی خزانے سے ادا کیا گیا ،اس کرپشن کیس کی تحقیقات اب نیب کے سپرد ہیں۔پاکستان کرکٹ بورڈ کو اس بات کا قطعی علم نہیں تھا کہ بیلجیئم کی کرکٹ ٹیم سرکار ی اخراجات پر پاکستان کے دورے پر آئی ہوئی ہے۔ اس ٹیم کے ساتھ جڑا ہوا شخص رانا مشہود کا انتہائی قریبی آدمی تھا جو ان کے لیے ڈرائیونگ اور دیگر سپیشل ڈیوٹیاں سرانجام دیتا تھا۔رانا مشہود نے کسی قانونی یا آئینی تقاضے کو پورا کیے بغیر مذکورہ شخص کو اپنا کوآرڈینیٹر مقرر کیا ہو ا تھا جبکہ اسے آفس ،گاڑی اور دیگر سہولیات بھی فراہم کی ہوئی تھیں۔ نیب حکام کے مطابق انہوں نے رانا مشہود کیخلاف پنجاب یوتھ فیسٹیول میں بڑے پیمانے پر مالی بیضابطگیوں کے الزامات کی تحقیقات شروع کررکھی ہیں۔ ۔