دہلی (نیوز ڈیسک) انڈین پریمئر لیگ میں کنگز الیون پنجاب کی شریک مالکہ پریتی زنٹا نے جیتا ہوا میچ ہارنے پر ٹیم کوچ کی بے عزتی کر ڈالی۔ رائل چیلنجرز بنگلور کیخلاف میچ کے دوران ایک موقع پر پنجاب کی پوزیشن انتہائی مضبوط تھی اور ایسا محسوس ہو رہا تھا کہ پنجاب آسانی سے میچ جیت جائے گا تاہم حیران کن طور پر بنگلور نے یہ میچ 1 رن سے جیت لیا۔ میچ کے خاتمے کے بعد پنجاب کی شریک مالکہ پریتی زنٹا کنگز الیون پنجاب کے ڈگ آٹ میں گئیں جہاں انہوں نے پنجاب کے کوچ سنجے بانگر کو بیٹنگ آرڈر میں تبدیلی پر کھری کھری سنائیں اور انتہائی نازیبا الفاظ بھی استعمال کیے۔ سنجے بانگر نے میچ کے دوران انتہائی اہم موقع پر اکشر پٹیل کو بھیجنے کی بجائے فرحان بہاردین کو بلے بازی کا موقع دیا تھا جو کچھ خاص کرنے میں ناکام رہے اور پنجاب جیتا ہوا میچ ہار گیا۔ یہ پہلا موقع نہیں تھا جب پریتی زنٹا کو کرکٹ میچ کے دوران اتنے غصے میں دیکھا گیا، 2012 میں بھی انہوں نے کولکتہ نائیٹ رائیڈرز کیخلاف میچ میں شان مارش کو ایل بی ڈبلیو آٹ دیئے جانے پر غصے کا اظہار کیا تھا۔