لاہور(نیو زڈیسک) پاکستان کرکٹ بورڈ (پی سی بی) نے ڈومیسٹک ون ڈے ٹورنامنٹ پاکستان کپ میں مستقل اچھی کارکردگی کا مظاہرہ کرنے والے کھلاڑیوں کا ڈوپ ٹیسٹ لینے کا عمل شروع کردیا ہے۔پی سی بی کے اہلکار کا کہناہے کہ آئی سی سی نے بورڈ کو سختی سے احکامات صادر کئے ہیں کہ ممنوعہ ادویات کے استعمال پر کڑی نظر رکھی جائے۔ تفصیلات کے مطابق پاکستان کپ میں شامل محمد عرفان، محمد سمیع، خرم منظور، سمیع اسلم، بلاول بھٹی اور محمد حسن سمیت چھ دیگر کھلاڑی ڈوپ ٹیسٹ کے لیے فہرست میں شامل ہیں۔پی سی بی اہلکارکا کہنا تھا کہ’پاکستان کپ کے ہر میچ کے بعد دو کھلاڑیوں کا ٹیسٹ کیا جائے گا’۔واضح رہے پاکستانی لیگ اسپنر یاسر شاہ کو آئی سی سی کی جانب سے کئے جانے والے ڈوپ ٹیسٹ میں ناکامی پر رواں سال فروری میں عارضی طور پر معطل کیا گیا تھا۔یاسر شاہ کا ڈوپ ٹیسٹ دسمبر میں انگلینڈ ٹیم کے خلاف مکمل سیریز کے دوران متحدہ عرب امارات میں کیا گیا تھا جہاں قومی ٹیم نے ٹیسٹ سیریز میں کامیابی حاصل کی تھی جبکہ ون ڈے اور ٹی ٹوئنٹی میں ناکامی کا سامنا کرنا پڑا تھا۔یاسر کی تین ماہ کی پابندی 27 مارچ کو ختم ہوئی تھی۔فیصل آباد میں جاری پاکستان کپ میں یاسر شاہ خیبرپختونخوا ٹیم کی نمائندگی کررہے ہیں۔پاکستان کپ میں خیبرپخوتخوا، بلوچستان، سندھ، پنجاب اور اسلام آباد پر مشتمل پانچ ٹیمیں حصہ لے رہی ہیں جہاں قومی ٹیم کے کھلاڑیوں سمیت ڈومیسٹک اور انڈر 19 کھلاڑیوں کو شامل کیا گیا ہے۔