دبئی(نیوزڈیسک) آئی سی سی بورڈ میٹنگ میں بے لگام ویسٹ انڈین کرکٹرز کی سرزنش کردی گئی۔دبئی میں ہونے والے اجلاس میں ارکان نے کہاکہ بھارت میں ورلڈ ٹوئنٹی 20 کا انعقاد بہترین ماحول میں ہوا اور شائقین نے اپنے پسندیدہ کھیل کا بھرپور لطف اٹھایا، چمپئن بننے والی ویسٹ انڈین مینز اور ویمنز ٹیمیں بھی مبارکباد کی مستحق ہیں تاہم کیریبیئنزنے میڈیا کے سامنے جس طرح کے متنازع باتیں کیں وہ قابل قبول نہیں، لاکھوں شائقین کے سامنے جوش میں ہوش کھونا کسی طور مناسب نہیں تھا، اگرچہ ویسٹ انڈین کرکٹ بورڈ نے معذرت بھی کرلی لیکن دوسروں کی ذاتیات پر حملے انٹرنیشنل کھلاڑیوں کو زیب نہیں دیتے۔آئی سی سی کے چیئرمین ششانک منوہر نے کہا کہ جیت اور ہار دونوں میں وقار برقرار رکھنا ہی کرکٹ کا حسن ہے، پلیئرز کو حریفوں، شائقین اور اسپانسرز کے جذبات کا خیال رکھنا چاہیے۔