اسلام آباد(نیوز ڈیسک) پاکستان کی ٹیسٹ ٹیم کے کپتان مصباح الحق نے رواں سال انگلینڈ کی سیریز کیلئے خود کو فٹ اور فارم میں رکھنے کیلئے اے ٹیم کی نمائندگی کرنے کا فیصلہ کیا ہے۔ کرک انفو کو ایک انٹرویو میں انہوں نے کہا کہ بدقسمتی سے مجھے کاؤنٹی کھیلنے کا موقع نہیں ملا تاہم میں دورے سے قبل اپنی ٹیم کے چند لڑکوں کے ساتھ تھوڑا پہلے ہی انگلینڈ جانے کی منصوبہ بندی کر رہا ہوں تاکہ کچھ پریکٹس میچز کھیل کر وہاں کی کنڈیشنز کے مطابق خود کو ڈھال سکیں۔ دورے سے قبل مجھے پاکستان کپ، کنڈیشننگ کیمپ اور اے ٹیم میں نمائندگی کا موقع ملے گا۔ایک روزہ اور ٹی ٹوئنٹی فارمیسٹ سے ریٹائرمنٹ کے سب ایک عرصے سے کوئی میچ نہ کھیلنے والے مصباح نے کہا کہ فارغ رہنا بہت مشکل ہے تاہم میں نے انگلینڈ کی سیریز کھیلنے کیلئے اپنا ذہن بنا لیا ہے۔انہوں نے کہا کہ میں چاہتا ہوں کہ ایک مخصوص عرصے تک کھیل سکوں تاکہ نوجوان میری جگہ لینے کیلئے تیار ہو سکیں۔ مجھے امید ہے کہ جب میں کھیل چھوڑ کر جاؤں گا تو پاکستانی ٹیم محفوظ ہاتھوں میں اور اپنے پیروں پر کھڑی ہو چکی ہو گی۔انہوں نے کہا کہ اگر ٹیم متحد رہی تو جب میری جگہ نیا کپتان آئے گا تو کسی کو بھی فرق محسوس نہیں ہو گاتاہم مصباح نے واضح کیا کہ تمام سیریز کھیلنے کا انحصار فارم اور فٹنس پر ہے، اگر فارم اور فٹنس ٹھیک نہ رہی تو وہ ٹیم پر بوجھ بننے کے بجائے خود چلے جائیں گے۔