کراچی (این این آئی)قومی ٹی 20 ٹیم کے کپتان سرفراز احمد نے کہا ہے کہ گھر والوں سے کرکٹ کے حوالے سے بہت کم بات چیت کرتاہوں اور اگر انڈیا سے میچ ہارجائیں تو گھر میں کرکٹ پر کوئی بات نہیں ہوتی ٗ اہلخانہ کو میچ کی بات کرنے سے منع کیا ہوا ہے ۔ایک انٹرویو کے دوران میزبان کے سوال پر سرفراز احمد کا کہنا تھا کہ انڈیا کے میچ میں فیملی ٗپاکستان کے عوام اور دوستوں کا بہت زیادہ پریشر ہوتا ہے اور جب میچ ہار جائیں تو پورے ڈریسنگ روم کا ماحول بہت خراب ہوجاتا ہے اور بہت ہی برا محسوس ہوتا ہے ٗہر کھلاڑی لوگوں کی توقعات ٹوٹنے پر افسردہ ہوجاتا ہے اس لیے گھر والوں کو میچ کی بات کرنے سے منع کیا ہوا ہے کیونکہ انڈیا کے خلاف جب گراونڈ میں جاتے ہیں تو 70 سے 80 ہزارتماشائیوں کا بہت پریشر ہوتا ہے اور باہر جا کر گھر والوں کی طرف سے بھی سپورٹ نہ ملے تو بندہ احساس کمتری کا شکار ہوجاتا ہے اس لیے میری کوشش ہوتی ہے کہ گھر والوں سے کرکٹ پر بات کم سے کم کی جائے تاکہ ایک میچ ہارنے کے بعد اگلے میچوں پر اثر نہ پڑے۔سرفراز احمد نے کہا کہ جو بھی پلان ملا اس پر عملدرآمد کرتے ہوئے شائقین کی توقعات پر پورا اترنے کی کوشش کروں گا، شاہد آفریدی کو بطور کھلاڑی کھلانے میں کوئی حرج نہیں انہوں نے 20 سالہ کیریئر میں کئی بار ملکی فتوحات میں اہم کردار ادا کیا اور وہ اب بھی ایسا کر نے کی صلاحیت رکھتے ہیں۔ شاہد آفریدی کے بیٹنگ نمبر کے حوالے سے کپتان نے کہاکہ آفریدی تیسر ے یا چوتھے نمبر پر بیٹنگ کیلئے موزوں ثابت ہوسکتے ہیں۔