سڈنی (نیوز ڈیسک) سابق عظیم لیگ اسپنر شین وارن نے آسٹریلین ٹیم کی سلیکشن کو شدید تنقید کا نشانہ بناتے ہوئے کہا ہے کہ غلط انتخاب ٹیم کے ورلڈ ٹی ٹوئنٹی کے گروپ مرحلے سے اخراج کی ذمے دار ہے۔ورلڈ ٹی ٹوئنٹی کے اہم میچ میں آسٹریلیا کی ٹیم ہندوستان کے ہاتھوں شکست کے باعث ایونٹ کے گروپ مرحلے سے ہی باہر ہو گئی جس سے اس کی ورلڈ ٹی ٹوئنٹی جیتنے کی امیدیں ایک بار پھر دم توڑ گئیں۔شین وارن نے کہا کہ سب سے پہلی بات تو یہ ہماری ٹیم کا انتخاب ہی درست نہیں تھا، ہم نے ثابت شدہ فارمولے پر عمل کرنے کے بجائے غیرضروری چیزوں کے گرد گھومتے رہے اور ہم نے زیادہ اچھا کھیل بھی پیش نہ کیا جو ایک کڑوا سچ ہے۔شین وارن نے کہا کہ عثمان خواجہ کو تیسرے نمبر پر بیٹنگ کرانی چاہیے تھی اور ایرون فنچ اور ڈیوڈ وارنر کی اوپننگ جوڑی کو نہیں توڑنا چاہیے تھا کیونکہ اس سے ٹیم کا توازن بگڑ گیا۔انہوں نے کہا کہ وارنر اور فنچ ایک عرصے سے ساتھ بیٹنگ کرتے ہوئے ٹی ٹوئنٹی اور ایک روزہ میچوں میں اچھی کارکردگی کا مظاہرہ کر رہے تھے لیکن یکدم ان کی جوڑی کو توڑ دیا گیا۔کرکٹ کی تاریخ کے کامیاب ترین لیگ اسپنر نے آخری دونوں میچوں میں آل راؤنڈر جان ہیسٹنگز پر جوش ہیزل وڈ کو ترجیح دینے پر بھی سوالات اٹھائے۔انہوں نے کہا کہ ہماری ٹیم میں بے پناہ صلاحیت اور مہارت ہے لیکن اگر آسٹریلین سلیکٹرز یہ سوچتے ہیں کہ چاہے کامبی نیشن کچھ بھی ہو، ہم جیت جائیں گے تو ایسا ہرگز نہیں ہے۔