لاہور (نیوز ڈیسک) پاکستان کرکٹ بورڈ نے قومی ٹیم کی مایوس کن کارکردی پر سلیکشن کمیٹی اور ٹیم مینجمنٹ میں آپریشن کلین اپ کا فیصلہ کر لیا ،سلیکشن کمیٹی توڑ کر چیف سلیکٹر ہارون رشید ، ہیڈ کوچ وقار یونس اور ٹی ٹونٹی کے کپتان شاہد خان آفریدی کو فارغ کردیا جائے گا جبکہ ایشیاءکپ میں مایوس کن کارکردی کا جائزہ لینے والی کمیٹی کو ورلڈ ٹی ٹونٹی میں بھی قومی ٹیم کی خراب پرفارمنس کی وجوہات جاننے کا ٹاسک دینے کا فیصلہ کر لیا گیا۔ میڈیا رپورٹس کے مطابق بنگلہ دیش میں ہونے والے ایشیاءکپ ٹی ٹونٹی کے بعد بھارت میں ہونے والے ٹی ٹونٹی ورلڈ کپ میں بھی قومی کرکٹ ٹیم کی مایوس کن کارکردی پر پوری قوم کے ساتھ پاکستان کرکٹ بورڈ بھی ناراض ہے جس کے باعث بورڈ نے سلیکشن کمیٹی اور ٹیم مینجمنٹ میں آپریشن کلین اپ کا فیصلہ کر لیا ہے ۔ ذرائع کے حوالے سے بتایا گیا ہے کہ چیف سلیکٹر ہارون رشید ، ہیڈ کوچ وقار یونس اور ٹی ٹونٹی کے کپتان شاہد خان آفریدی کو فارغ کردیا جائے گا ۔ذرائع نے بتایا ہے کہ پی سی بی ہیڈ کوچ اور چیف سلیکٹر کودوسرا موقع دینانہیں چاہتی ۔جبکہ ہارون رشید کو پی سی بی بھی فارغ کرنے کا فیصلہ ہوا ہے ۔ ذرائع نے بتایا ہے کہ سلیکشن کمیٹی توڑ دی جائے گی ،شاہد آفریدی ریٹائرڈ ہو جائیں گے اور مزید موقع نہیں دیا جائے گا۔ مزید بتایا گیا کہ وقار یونس کے معاہدے میں توسیع نہیں کی جائے گی ،قومی سلیکٹرز تحقیقاتی کمیٹی کے سامنے ذمہ داری قبول کر چکے ہیں۔ذرائع کے حوالے سے مزید بتایا گیا ہے کہ ایشیاءکپ میں مایوس کن کارکردی کا جائزہ لینے والی کمیٹی کو ورلڈ ٹی ٹونٹی میں بھی خراب پرفارمنس کی وجوہات جاننے کا ٹاسک دینے کا فیصلہ کیا گیا ہے۔شکیل شیخ کی سربراہی میں قائم 5رکنی کمیٹی کے دیگر اراکین میں سبحان احمد ، اقبال قاسم ، مصباح الحق اور یونس خان شامل ہیں ۔ کمیٹی خاص طور پر بیٹسمینوں کی کارکردی اور ٹیم میں گروپ بندیوں کے حوالے سے جائزہ لے گی اور گرین شرٹس کی ناکامیوں کی وجوہات سے پی سی بی کو آگاہ کرے گی۔