کولکتا(نیوز ڈیسک)پاکستان کے تجربہ کار آل راونڈر شعیب ملک نے کہا ہے کہ ایشیا کپ میں جو ہو گیا سو ہو گیا، ورلڈ ٹی ٹوئنٹی الگ ایونٹ ہے ،یہ اچھا موقع ہے کہ اس میں بھرپور پرفارمنس دیں اور پاکستان کو دنیا کی دیگر ٹیموں کے مقابل لا کھڑا کریں۔ کولکتا کے ایڈین گارڈن میں میڈیا سے گفتگو میں شعیب ملک نے کہا کہ ایشیا کپ میں جو ہوا وہ ماضی کا حصہ ہے اور پروفیشنل کرکٹ میں ایسا ہو جاتا ہے،لیکن بھارت میں ٹیم اچھا پرفارم کرے گی۔ شعیب ملک نے کہا کہ انہوں نے کیرئیر کا آغاز بطور اسپنر کیااور پھر بیٹسمین بن گئے، وہ ٹیم کی ضرورت کے مطابق ہر نمبر پر کھیلتے رہے ہیں اور آئندہ بھی تیار ہیں ، وہ اپنی مہارت بڑھانے کےلیے محنت کر رہے ہیں۔شعیب ملک نے اس موقع پراچھی سیکورٹی دینے پر بھارتی حکومت کا شکریہ ادا کیا اورساتھ ہی کہا کہ ان کی اہلیہ کا تعلق بھارت سے ہے وہ بہت بار یہاں آ چکے ہیں ،انہیں کبھی سیکورٹی کا مسئلہ درپیش نہیں آیا۔