اسلام آباد (نیوز ڈیسک) پاکستانی سکیورٹی ٹیم نے بھارت میں پاکستانی ہائی کمشنر عبد الباسط سے ملاقات کی اور اپنی رپورٹ پیش کر دی۔ رپورٹ کے مطابق بھارت کی مرکزی حکومت کی ضمانت کے بغیر قومی ٹیم کو ہمسایہ ملک نہیں بھیجا جائے گا۔ رپورٹ میں یہ بھی کہا گیا ہے کہ پاک بھارت میچ دھرم شالا کے بجائے کسی دوسرے مقام پر منتقل کیا جائے۔وزیر داخلہ چودھری نثار علی خان کا کہنا ہے کہ انہیں ابتدائی رپورٹ موصول ہو گئی ہے، ٹیم کو بھارت روانہ کرنا ہے یا نہیں فیصلہ کل کیا جائے گا۔ ٹی 20 ورلڈ کپ شروع ہو گیا لیکن دوسری طرف بھارت میں کھیل پر تماشہ بھی جاری ہے۔ کرکٹ جیسے ہر دلعزیز کھیل کے دشمنوں نے بھارت میں دہائی ڈال دی ہے۔ہما چل پردیش کے وزیر اعلیٰ ویر بہادرا سنگھ نے گویا جلتی پر تیل ڈال دیا، کہتے ہیں کہ سکیورٹی انتظامات سخت ہوں گے البتہ اگر مظاہرین دیوار بن کر سامنے کھڑے ہو گئے تو پولیس سمیت وہ کچھ نہیں کر پائیں گے۔ ٹی 20 ورلڈ کپ میں انیس مارچ کو اسی دھرم شالا کے میدان پر پاکستان اور بھارت کی ٹیموں کو میدان میں اترنا ہے جہاں کھلاڑیوں سے پہلے بیان بازوں نے ماحول گرما دیا ہے۔