لاہور (نیوز ڈیسک) پاکستان ٹی ٹونٹی کرکٹ ٹیم کے کپتان شاہد خان آفریدی نے انگلش کرکٹ کاﺅنٹی ہمپشائر سے نیٹ ویسٹ ٹی ٹونٹی بلاسٹ کے پورے سیزن کے لیے معاہدہ کرلیا۔شاہد آفریدی نے اس سے قبل 2011 میں کلب کی نمائندگی کی تھی جہاں ٹیم ٹورنامنٹ کے سیمی فائنل تک رسائی میں کامیاب ہوئی تھی اور آفریدی نے سمرسیٹ کے خلاف 42 گیندوں پر 80 رنز کی یادگار اننگز کھیلی تھی۔آفریدی کلب میں جنوبی افریقی آل راﺅنڈر ریان مک لیرن کے ساتھ غیر ملکی کھلاڑی کے طور پر شامل ہوں گے۔کرکٹ ویب سائٹ کرک انفو کی رپورٹ کے مطابق آفریدی رواں سال مئی میں ہمپشائر پہنچ جائیں گے جس کے لیے انہوں نے کیریبئین پریمیئر لیگ سے معاہدہ کرنے سے انکار کیا تھا جبکہ اس دوران انہیںبین الاقوامی طور پر کسی مقابلے کے لیے قومی ٹیم کی نمائندگی بھی نہیں کرنی ہے۔ہمپشائر کے ڈائریکٹر کرکٹ جائلز کلارک کا کہنا تھا کہ اس سال ایک مخصوص عرصے کے لیے کھلاڑیوں کا حصول ایک چیلنج تھا اس لیے ہم خوش ہیں کہ آفریدی پورے ٹورنامنٹ کے لیے ہمیں دستیاب ہیں۔ان کا کہنا تھا کہ آفریدی نے گزشتہ دفعہ ہماری نمائندگی کی تھی اور اپنی کارکردگی کے ذریعے گہرے اثرات مرتب کئے تھے اور ان کی واپسی ٹی ٹونٹی ٹورنامنٹ کے لیے بڑی حوصلہ افزا ہے۔انگلش کاﺅنٹی کے ٹی ٹونٹی بلاسٹ کے موجودہ طرز کی 2017 میں تبدیلی متوقع ہے جہاں ریجنل کے مقابلے میں دو ڈویژن پر مشتمل ٹورنامنٹ کو ترجیح دی جائے گی۔