دبئی(نیوز ڈیسک)کوئٹہ گلیڈی ایٹرز کے کپتان سرفراز احمد نے کہا ہے کہ ان کی ٹیم کے تمام کھلاڑی فارم میں ہیں اور فائنل میچ میں وہ پوری تیاری سے میدان میں اتریں گے، پی ایس ایل کے آغاز میں کوئٹہ گلیڈی ایٹرز کو کمزور ٹیم سمجھ کراہمیت نہیں دی جارہی تھی کیونکہ اس میں بڑے نام بھی شامل نہیں تھے لیکن ٹیم پلیئرز کی انتھک محنت اورکوچ اور پوری مینجمنٹ کی جانب سے بھر پور سپورٹ کی وجہ سے وہ پہلی پاکستان سپر لیگ کے فائنل میں پہنچنے میں کامیاب ہوئے ہیں۔ میڈیا سے گفتگو کرتے ہوئے کپتان کوئٹہ گلیڈایٹرز کا کہن تھا کہ سر ویوین رچرڈ کی وجہ سے بھی کھلاڑیوں کو بھرپور اعتماد حاصل ہوا ہے اور ان کے گھل مل کر رہنے اور ہر لمحہ کھلاڑیوں کی حوصلہ افزائی اور رہنمائی کرنے کی وجہ سے بھی کوئٹہ گلیڈی ایٹرز کو بہت فائدہ ہوا ہے۔پی ایس ایل کے حوالے سے سرفراز حمد کا کہنا تھا کہ اس سے پاکستان کرکٹ کو بہت فائدہ ہوگا اور اتنابہترین ایونٹ کروانے پر پی ایس ایل اور پی سی بی کی انتظامیہ مبارکباد کی مستحق ہے ، جب کہ پاکستانی عوام نے بھی اپنی بھرپور دلچسپی کا اظہار کیا ہے جس کی وجہ سے تمام کھلاڑیوں کے حوصلے بھی بلند ہوئے ہیں اور امید ہے کہ فائنل میں شائقین کو بہترین کرکٹ دیکھنے کو ملے گی۔