بارباڈوس(نیو زڈیسک)ویسٹ انڈین بلے باز شیونارائن چندرپال نے ہرطرح کی کرکٹ سے ریٹائرمنٹ کااعلان کردیا۔تفصیلات کے مطابق دو دہائیوں سے کرکٹ کھیلنے والے شیونارائن چندر پال نے 164 ٹیسٹ میچز میں ویسٹ انڈیز کی نمائندگی کی اور اپنی ٹیم کی طرف سے برائن لارا کے بعد سب سے زیادہ رنز بنائے۔ انہوں نے اپنے ٹیسٹ کیریئر میں 11867رنز بنائے ہیں۔ چندر پال نے 268 ون ڈے میں 8778 رنزسکور کیے جبکہ اپنی ٹیم کی طرف سے 22 ٹی 20 میچز بھی کھیل چکے ہیں۔انگلینڈ کے خلاف ہوم سیریز میں مایوس کن کارکردگی دکھانے پر شیونارائن چندرپال سلیکٹرز کی نظروں میں اپنا مقام کھو بیٹھے اور وہ مئی 2015 سے ویسٹ انڈین کرکٹ ٹیم کا حصہ نہیں بن سکے جبکہ انہیں ویسٹ انڈین کرکٹ ٹیم کا سنٹرل کنٹریکٹ بھی نہیں مل سکا۔ 8 ماہ کے طویل انتظار کے بعد بالآخر چندر پال نے ہر طرح کی کرکٹ ریٹائرمنٹ کا اعلان کردیا۔