مانچسٹر(آن لائن) انگلینڈ کی ٹیم کو پاکستان کے خلاف سیریز سے قبل ہی ایک بڑے مسئلے کا سامنا ہے جہاں انگلش ٹیم مینجمنٹ پاکستان کے خلاف ٹیسٹ سیریز کیلئے کپتان ایلسٹر کک کے اوپننگ پارٹنر کی تلاش میں مصروف ہے۔انگلینڈ کی ٹیم اکتوبر نومبر میں پاکستان کے خلاف تین ٹیسٹ میچوں کی سیریز کھیلے گی لیکن اس وقت انہیں اوپننگ پوزیشن پر ایلسٹر کک کے صحیح پارٹنر کی تلاش ہے۔ٹیسٹ سیریز میں ایڈم لتھ کی ناکامی کے بعد ایلکس ہیلز کو اک روزہ میچوں کی سیریز میں صلاحیتوں کے اظہار کا موقع فراہم کیا گیا لیکن پوری سیریز کے دوران وہ بدترین ناکامی کا شکار ہوئے اور پانچ میچوں میں 10.60 کی اوسط سے محض 53 رنز بنا سکے۔اس سے قبل ٹیسٹ میچوں میں ایڈم لتھ بدترین ناکامی کا شکار ہوئے جنہوں نے سیزن کے سات ٹیسٹ میچوں میں صرف 20.38 کی اوسط سے رنز بنائے۔

مزید پڑھئے: اہم حکومتی ادارے میں کروڑوں کی کرپشن کا انکشاف

انگلش ٹیم کے کوچ ٹریور بیلس نے تسلیم کیا کہ ٹیسٹ کپتان ایلسٹر کک کے پارٹنر کی تلاش ایک گمبھیر مسئلہ بن چکی ہے۔انہوں نے کہا کہ کوئی ایسا نہیں جو خود سامنے آکر یہ ذمے داری لے، یہاں متعدد اچھے کھلاڑی نے جنہوں نے اچھے سیزن گزارے لیکن میرا نہیں خیال یہاں کوئی ایسا ہو جس نے چھ یا سات سنچریاں بنائی ہوں کیونکہ اگر ایسا ہوتا تو ہم اسے براہ راست ٹیم میں شامل کر لیتے۔