کراچی (نیوز ڈیسک): شہر قائد کے علاقے صدر میں ہوٹلوں پر کارروائی کے دوران انسانی اسمگلنگ کے ایک بڑے نیٹ ورک کا انکشاف ہوا ہے، جہاں سے 32 خواتین کو بازیاب کروا لیا گیا۔

فیڈرل انویسٹی گیشن ایجنسی (ایف آئی اے) کے اینٹی ہیومن ٹریفکنگ سیل نے چھاپے مار کر اس گروہ کے خلاف کارروائی کی، جس میں ایک خاتون سمیت 4 ملزمان کو گرفتار کیا گیا۔ حکام کے مطابق یہ گروہ خواتین کو بیرونِ ملک لے جا کر استحصال میں ملوث تھا۔ڈپٹی ڈائریکٹر محمد اجمل کے مطابق متاثرہ خواتین کا تعلق پاکستان کے مختلف علاقوں سے ہے۔ ملزمان انہیں سیاحتی ویزے پر دبئی لے جاتے اور وہاں نائٹ کلبز میں کام کرواتے تھے۔

انہوں نے مزید بتایا کہ ان خواتین کو بعض غیر قانونی اور غیر اخلاقی سرگرمیوں میں بھی ملوث کیا جاتا تھا۔ گروہ میں شامل خاتون کا کردار اہم تھا، جو ملازمت کا جھانسہ دے کر لڑکیوں کو بیرونِ ملک جانے پر آمادہ کرتی تھی۔ایف آئی اے نے گرفتار افراد کے خلاف مقدمات درج کر لیے ہیں اور مزید تحقیقات جاری ہیں۔ حکام کا کہنا ہے کہ اس نیٹ ورک کے دیگر ارکان کی گرفتاری کے لیے بھی مختلف مقامات پر چھاپے مارے جا رہے ہیں۔