لالہ موسیٰ(این این آئی)پولیس نے بیوی رضامندنہ ہونے پر شوہر کے خلاف بیوی سے بدفعلی کا مقدمہ درج کر کے تفتیش شروع کر دی۔
لالہ موسیٰ کے نواحی تھانہ دولت نگر کے علاقے میں شوہر کی جانب سے بیوی کے ساتھ مبینہ زیادتی کا سنگین واقعہ سامنے آیا ہے جس پر پولیس نے مقدمہ درج کر لیا۔پولیس رپورٹ کے مطابق مقدمہ نمبر 137/26 بجرم دفعہ 377 درج کیا گیاجس کی مدعیہ عشرت ناز دختر کرامت حسین، سکنہ دھمہ ملکہ، تحصیل و ضلع گجرات ہے۔ مدعیہ نے اپنے بیان میں موقف اختیار کیا کہ اس کی شادی تقریباً ساڑھے تین سال قبل عامر محمود ولد خادم حسین سکنہ ہربانس پور سے ہوئی تھی تاہم وہ شادی کے بعد زیادہ تر اپنے میکے میں ہی رہتی رہی۔مدعیہ کے مطابق اس کا شوہر اکثر اس کی مرضی کے خلاف اس کے ساتھ بدفعلی کرتا رہا۔
بتایا گیا کہ 11 اور 12 دسمبر 2025 کی درمیانی شب ملزم اس کے میکے آیا اور اس کی رضامندی کے بغیر اس کے ساتھ زیادتی کی جس کے نتیجے میں اسے اندرونی چوٹیں آئیں،خاتون نے واقعہ اپنی والدہ کو بتایا جس پر ملزم نے ابتدائی طور پر علاج کروانے اور آئندہ ایسا عمل نہ کرنے کی یقین دہانی کروائی تاہم بعد میں وہ اپنے وعدے سے مکر گیا اور نہ ہی دوبارہ رابطہ کیا۔مدعیہ کی درخواست پر پولیس نے مقدمہ درج کر کے تفتیش کا آغاز کر دیا ہے جبکہ ملزم کی گرفتاری کے لیے کارروائی جاری ہے۔پولیس حکام کے مطابق کیس کو میرٹ پر یکسو کیا جائے گا اور متاثرہ خاتون کو ہر ممکن قانونی تحفظ فراہم کیا جائے گا۔
