ہرارے (نیوز ڈیسک) کرکٹ زمبابوے کے چیئرمین ولسن مناسے نے کہا ہے کہ کھلاڑیوں نے اپنے ریگولر معاہدوں کے تحت دورہ پاکستان پر آمادگی ظاہر کی اور انہیں اسی کے مطابق ادائیگی کی جائے گی ، یہ ایک دوستانہ دورہ ہے جس سے مالی فوائد حاصل نہیں کئے گئے۔ا نہوں نے تصدیق کی کہ دورہ پاکستان کیلئے کھلاڑیوں کی جان و مال کا بیمہ کرایا گیا ہے تاہم انہوں نے مجموعی رقم بتانے سے گریز کیا۔ پاکستان میں اپنی ٹیم کو جوائن کرنے کیلئے ہرارے سے روانگی کے وقت انہوں نے پاکستان میں زمبابوین کھلاڑیوں کی سکیورٹی کیلئے مقامی انتظامیہ کی جانب سے حفاظتی انتظامات پر اطمینان کا اظہار کیا۔ولسن لاہور میں ٹیم کے پرجوش استقبال پر بھی کافی شکر گزار نظر آئے۔