ایڈیلیڈ (نیوز ڈیسک) پاکستان کرکٹ ٹیم کے سپن باؤلنگ کوچ مشتاق احمد نے کہا ہے کہ اچھی ٹیمیں اور کھلاڑی ماضی کو یاد نہیں رکھتے ہیں، پوری ٹیم حالیہ صورتحال پر توجہ مرکوز رکھے ہوئے ہے اور ہر حال میں آئرلینڈ کے خلاف میچ جیتنا چاہتے ہیں۔ میڈیا سے گفتگو کرتے ہوئے مشتاق احمد نے کہا کہ ورلڈکپ میں ہر میچ ہی اہم ہوتا ہے اور تمام کھلاڑی یہ جانتے ہیں کہ انہیں آئرلینڈ کے خلاف پوری قوت کے ساتھ کھیلنا ہے۔ ایک سوال کے جواب میں مشتاق احمد نے کہا کہ ورلڈکپ کے میچ میں آئرلینڈ کے ہاتھوں شکست ماضی کا قصہ ہے جسے یاد نہیں رکھنا چاہتے اور ہر اچھی ٹیم اور کھلاڑی ایسا ہی کرتا ہے۔ اس ورلڈکپ میں آئرلینڈ کے خلاف میچ آخری پول میچ ہے جس میںفتح حاصل کر کے کوارٹر فائنل میں رسائی حاصل کریں گے۔