میکسیکوسٹی (نیو ز ڈیسک) نامور ٹینس سٹار ماریہ شراپوا میکسیکو اوپن کے سیمی فائنل میں پہنچ گئیں۔ تفصیلات کے مطابق ویمنز سنگلز ایونٹ کے دلچسپ مقابلے میکسیکو کے شہر ایکاپلکو میں جاری ہیں، ایونٹ کے پہلے کوارٹر فائنل میں ٹاپ سیڈڈ روس کی ماریہ شراپوا نے سلواکیہ کی میڈلینا ریبریکووا کو 6-1 ، 4-6 اور 6-2 سے ہرا کر سیمی فائنل تک رسائی حاصل کی۔ ایونٹ کے دوسرے کوارٹر فائنل میں تھرڈ سیڈڈ فرانس کی کیرولین گریشیا نے کروشیا کی میرجانہ لوچچ کو ہرا کر سیمی فائنل کیلئے کوالیفائی کیا۔ سوئٹزرلینڈ کی تائمہ نے سویڈن کی جوہانہ لارسن کو 6-3 اور 6-3 سے ہرا کر سیمی فائنل میں جگہ بنائی۔ ایک اور میچ میں بلغاریہ کی سیسل کراٹنچیوا نے پوٹرو ریکو کی مونیکا پوئگ کو سخت مقابلے کے بعد 2-6 ، 7-6 اور 6-4 سے شکست دی۔