لاہور   بالنگ کی پابندی سے آزاد ہونے والے سٹار پاکستانی سپنر سعید اجمل نے کہاہے کہ اس مرتبہ پاکستان ہندوستان کو شکست دے کر ورلڈ کپ میں نئی تا ریخ رقم کرے گا ۔ آئی سی سی کی جانب سے بالنگ ایکشن کلیئر قرار دیے جانے کے بعد پہلی مرتبہ پی سی بی اکیڈمی انڈر 19 اور پی سی بی اکیڈمی انڈر 17 ٹیموں کے درمیان ایل سی سی اے گراونڈ میںمیچ کھیلا اور بالنگ پریکٹس کی۔اس موقع پر انہوں نے کہا کہ میگا ایونٹ کے لئے طلب کیا گیا تو ضرور جاوں گا ۔ اجمل نے کہا کہ مجھے ردھم میں آنے کے لیے میچ پریکٹس درکار ہے اور کوشش کر رہا ہوں کہ جلد از جلد اپنی پرانی فارم بحال کر سکوں۔ورلڈ کپ میں پاکستان اور انڈیا کے درمیان میچ کے حوالے سے سوال پر ورلڈ کلاس سپنر نے کہا کہ ہندوستانی ٹیم آسٹریلیا میں مستقل شکستوں سے دوچار ہے اور پاکستان بھی شکستیں کھا رہا ہے لہٰذا دونوں ٹیمیں ہی مشکلات سے دوچار ہیں ۔ یاد رہے کہ محمدحفیظ کے ورلڈ کپ سکواڈ سے باہر ہونے پر سعید اجمل کی اہمیت میں اضافہ ہوا ہے کیونکہ اس وقت قومی ورلڈ کپ سکواڈ میں کوئی آف سپنر نہیں اور حفیظ کے ٹیسٹ دے کر پاس ہونے کی امید ان کے زخمی ہونے پر پہلے ہی دم توڑ گئی ہے ۔