اسلام آباد(مانیٹرنگ ڈیسک)گجرات کی خاتون نسیم اختر کی قرآن پاک سےمحبت کی انوکھی مثال، 32سال کپڑے پر کڑھائی کر کے قرآن مجید لکھتی رہی۔ نجی ٹی وی نائنٹی ٹو نیوز کی رپورٹ کے مطابق گجرات کے علاقے گڑھی احمد آباد کی رہائشی نسیم اختر کا دعویٰ ہے کہ وہ دنیا کی پہلی گھریلو خاتون ہے جس نے قرآن مجید ہاتھ سے کپڑے پر کڑھائی کر کے لکھا ہے۔

نسیم اختر نے کپڑے پر قرآن مجید لکھنے کے کام کا آغاز 1987میں کیا۔انہوں نے 32سال کی محنت کے بعد بالآخرکپڑے پر ہاتھ سے کڑھائی کر کے قرآن مجیدمکمل کر لیا ۔ نسیم اختر کے ہاتھ سے کپڑے پر کڑھائی سے لکھے گئے قرآن مجید کی 10جلدیں ہیں اور ہر جلد میںقرآن مجید کے تین سپارے ہیں۔ نسیم اختر کا کہنا ہے کہ انہیں خوشی ہے کہ انہوں نے 32سال قبل جس مقدس کام کا بیڑا اٹھایا تھا وہ مکمل کر لیا ۔ میں نے 32سال باوضو وقت گزارا، خواہش ہے کہ حکومت پاکستان سعودی عرب کو یہ قرآن مجید بطور تحفہ دے۔ نجی ٹی وی سے بات کرتے ہوئے نسیم اختر نے کہا کہ جب میں قرآن مجید ہاتھ سے کپڑے پر کڑھائی کر کے لکھنا شروع کیا تو یہی سوچا تھا کہ قرآن مجید کے اس نادر نسخے کو میں مدینہ شریف کی لائبریری میں لے کر جائوں گی۔ مدینہ شریف کی لائبریری میں نے دیکھی ہوئی ہے وہ لائبریری بہت بڑی لائبریری ہے اور میری خواہش ہے کہ قرآن شریف کا میرا ہاتھ سے کپڑے پر کڑھائی کر کے لکھا گیا یہ نسخہ مدینہ شریف کی لائبریری کا حصہ بنے اور دنیا بھر کے مسلمان اس کو دیکھیں۔ نسیم اختر نے بتایا کہ وہ قرآن مجید جس کپڑے پر کڑھائی کر کے لکھتیں وہ کپڑا خصوصی طو رپر فیصل آباد سے منگواتی تھیں۔ نسیم اختر نے دعویٰ کیا کہ قرآن مجید کا ایسا نسخہ دنیا بھر میں کہیں بھی موجود نہیں لہٰذا ان کا یہ کارنامہ گنیز بک آف ورلڈ ریکارڈ میں شامل کیا جائے۔

کپڑے پر کڑھائی کر کے لکھے گئے قرآن مجید کا کل وزن 55کلو گرام ہے جبکہ اس کی ہر جلد کی 22انچ لمبائی اور 15انچ چوڑائی ہے۔ قرآن مجید کے کل صفحات 724ہیں جبکہ کڑھائی کیلئے کالے اور گلابی رنگ کے دھاگے کے 84ڈبے استعمال کئے گئےہیں۔