لاہور(این این آئی)سکولز ایجوکیشن ڈیپارٹمنٹ پنجاب اوریونیسیف کے اشتراک سے آئوٹ آف سکو ل بچوں ،بچوں کی سکولوںمیں واپسی اورپڑھائی میں پیچھے رہ جانے والے بچوں کو انگریزی، اردو اور ریاضی کے بنیادی تصورات سے روشناس کرانے کیلئے منصوبے کا آغاز کر دیا گیا ،ابتدائی طور پر اس منصوبے کا آغاز پنجاب کے 5اضلاع میں کیا گیا ہے ۔

”ٹرانسفارمیشن ان ایکسیس ،لرننگ ، ایکویٹی اینڈ ایجوکیشن مینجمنٹ ”( TALEEM ) پروگرام کے تحت سکولز ایجوکیشن ڈیپارٹمنٹ پنجاب اور یونیسیف کے اشتراک سے پہلی مرتبہ گرمیوں کی چھٹیوں کے دوران پنجاب کے پانچ اضلاع بہاولپور، ڈیرہ غازی خان، میانوالی، مظفر گڑھ اور رحیم یار خان کے 1213 سکولوںمیں 1954 لرننگ کیمپس کا آغاز کیا گیا ہے ۔منصوبے کی کامیابی کا اندازہ اس بات سے لگایا جا سکتاہے کہ صرف ایک ہفتے کے دوران 75ہزار سے زائد بچوں کی انرولمنٹ ہو چکی ہے جبکہ اس منصوبے کے تحت 80 ہزار سے زائد طلباء مستفید ہوں گے ۔ بتایا گیا ہے کہ منصوبے کے تحت انرول ہونے والے بچوں کو اسٹیشنری ، ورک شیٹس اور دیگر سہولیات بھی مہیا کی جارہی ہیں ۔ تدریسی کیمپس کی حاضریوں اور تدریس کا تمام ڈیٹا ایف ایل این ایپلی کیشن کے ذریعے سے آن لائن محفوظ کیا جا رہا ہے۔ سماجی حلقوں کی جانب سے سکولز ایجوکیشن ڈیپارٹمنٹ اور یونیسیف کے مذکورہ پروگرام کی بھرپور ستائش کرتے ہوئے کہا گیا ہے کہ اس طرز کے منصوبوں کو پنجاب کے دیگر اضلاع تک بھی پھیلایا جانا چاہیے تاکہ زیادہ سے زیادہ بچے اس سے مستفید ہو سکیں ۔