اسلام آباد(این این آئی)ملک کے اقتصادی بحران کے دوران چین نے ایک مرتبہ پھر دوستی کا حق ادا کرتے ہوئے پاکستان کو ایک ارب ڈالر دے دیئے۔سٹیٹ بینک آف پاکستان کی جانب سے تصدیق کی گئی کہ چین کی جانب سے ایک ارب ڈالر پاکستان کو مل گئے ہیں،رقم بینک اکائونٹ میں منتقل کی گئی ۔ترجمان سٹیٹ بینک کے مطابق چین سے موصول ایک ارب ڈالر کمرشل قرضہ ہے،چین سے ایک ارب ڈالر موصول ہونے کے بعد پاکستان کے زر مبادلہ کے ذخائر میں اضافہ ہو گیا۔
خیال رہے کہ پاکستان نے رواں ہفتے چائنیزڈویلپمنٹ بینک کوپیشگی ادائیگی کی تھی،1ارب ڈالرزموصول ہونے کے حوالے سے وزیر خزانہ نے بتایا تھا۔واضح رہے کہ پاکستان کو عالمی مالیاتی فنڈ (آئی ایم ایف)سے قرض کے حصول کے لیے بھی چین نے پاکستان کا ہر ممکن ساتھ دیا ہے۔خیال رہے کہ چند روز قبل وزیر خزانہ اسحاق ڈار کی چین کی ناظم الامور پانگ چنکسو سے ملاقات کی تھی، اس ملاقات کے دوران ملکی اقتصادی بحران کے دوران چین سے مدد کی درخواست کی تھی۔
وزیر خزانہ نے1.3بلین ڈالر کے دو چینی تجارتی قرضوں کی ری فنانسنگ کا معاملہ اٹھایا۔وزارت خزانہ کی طرف سے جاری کردہ ایک بیان میں کہا گیا کہ وزیر خزانہ نے نویں جائزے کی تکمیل پر آئی ایم ایف کے ساتھ بات چیت میں پیش رفت کے بارے میں چارج ڈی افیئرز کو مزید اپ ڈیٹ کیا۔واضح رہے کہ چینی حکام نے پاکستان کو پہلے ہی یقین دہانی کرائی تھی وہ دونوں قرضے واپس کر دیں گے لیکن اسلام آباد چاہتا ہے رقم کی ادائیگی کے ساتھ ہی اسے دوبارہ قرض دیا جائے۔خیال رہے کہ ملکی سرکاری زر مبادلہ کے ذخائر اس وقت محض چار ارب ڈالر کے قریب ہیں جبکہ پاکستان اور عالمی مالیاتی ادارے (آئی ایم ایف)کے درمیان قرض معاہدہ معلق ہے جس کے لیے حکومت کوششوں میں مصروف ہے۔
