قاہرہ(این این آئی)مصر کے بحیرہ احمر میں روسی سیاح پر حملہ کر کے اسے نگلنے والی شارک کو میوزیم میں رکھنے کا فیصلہ کیا گیا ہے۔غیرملکی میڈیا کے مطابق رواں ماہ بحیرہ احمر میں شارک نے ایک 24 سالہ روسی سیاح پر حملہ کر کے اسے نگل لیا تھا۔

مصر کی وزارتِ ماحولیات کا کہنا تھا کہ روسی شخص پر ٹائیگر شارک نے حملہ کیا جسے پکڑ لیا گیا اور لیبارٹری میں یہ جاننے کی کوشش کی جارہی ہے کہ شارک نے حملہ کیوں کیا۔واقعے کے کچھ دن بعد پکڑی گئی شارک کا ماہرین کے ایک گروپ نے پوسٹمارٹم کیا جس سے پتا چلا کہ یہ مادہ مچھلی تھی۔ماہرین کے مطابق شارک کی آنتیں بالکل خالی تھیں جبکہ اس کے پیٹ میں شکار ہونے والے روسی نوجوان کے جسم کے کچھ ٹکڑے ملے تھے۔غیرملکی میڈیا کے مطابق شارک کے جسم پر خوشبو اور مصالے لگانے کا عمل شروع کردیا گیا ہے اور جیسے ہی یہ ممی بنانے کا عمل مکمل ہوگا تو میوزیم میں لوگوں کو شارک کو دیکھنے کی اجازت ہوگی۔مصری حکام نے کہا کہ محققین شارک کے رویے کی وجہ کو سمجھنا چاہتے ہیں اور یہ شناخت کرنا چاہتے ہیں کہ گزشتہ حملوں میں بھی کیا یہی شارک ملوث تھی۔