خانیوال(این این آئی)سابق ممبر قومی اسمبلی وفاقی پارلیمانی سیکرٹری دفاع میجر آفتاب احمد خان ڈاھا کے فرزند معروف سیاسی و سماجی شخصیت سابق ایم ایس سروسز ہسپتال لاہور ڈاکٹر وقار احمد خان ڈاھا نے لاہور میں سابق صدر آصف علی زرداری سے ملاقات کی،ڈاکٹر وقار احمد خان ڈاھا نے پاکستان پیپلز پارٹی میں باقاعدہ شمولیت اختیار کرلی ۔
ان کی پیپلز پارٹی میں شمولیت سابق وزیر اعظم سینٹر سید یوسف رضا گیلانی کی کوششوں سے ممکن ہوئی کیونکہ سید یوسف رضا گیلانی ان کے والد محترم میجر آفتاب احمد خان ڈاھا کے قریبی دوست ہیں ۔پیپلز پارٹی میں شمولیت کے موقع پر مرکزی رہنماء پاکستان پیپلز پارٹی نیر بخا ری، سابق گورنر پنجاب مخدوم سید احمد محمود، سابق وزیر اعلی پنجاب دوست محمد کھوسہ، سابق ایم پی اے عبدالقادر شاہین اور دیگر مرکزی قائدین بھی موجود تھے ۔
ڈاکٹر وقار احمد خان ڈاھا حلقہ این اے 145 خانیوال سے پاکستان پیپلز پارٹی کے قومی اسمبلی کے امیدوار ہونگے ۔یاد رہے کہ میجر آفتاب احمد خان ڈاھا 5 بار مسلسل رکن قومی اسمبلی منتخب ہوئے عوامی سماجی تجارتی اور سیاسی حلقوں و شخصیات اور پاکستان پیپلز پارٹی کے مقامی عہدیداروں نے ڈاکٹر وقار احمد خان ڈاھا کے آئندہ عام انتخابات میں حصہ لینے کے اعلان کا خیر مقدم کرتے ہوئے انہیں بھرپور تعاون کی یقین دہانی کروائی ہے ۔ڈاکٹر وقار احمد خان ڈاھا نے کہا کہ وہ اپنے والد محترم کی طرح عوام کی خدمت کو عوامی و سیاسی مشن سمجھ کر جاری رکھنے کے لیے الیکشن میں حصہ لے رہے ہیں اور اپنے والد محترم کے دوستوں کو ساتھ لے کر چلیں گے اور ان سے مشاورت سے انتخابی مہم چلائیں گئے ۔
