اسلام آباد (این این آئی)قومی اسمبلی نے 9 مئی کو فوج اور ریاستی تنصیبات پر حملوں میں ملوث شر پسندوں کے خلاف آرمی ایکٹ اور انسداد دہشت گردی ایکٹ سمیت موجودہ قوانین کے تحت مقدمات چلانے کی قرارداد منظور کرلی جبکہ وزیر دفاع خواجہ محمد آصف نے کہا ہے کہ 9 مئی کو دلخراش اور دل دہلا دینے والے واقعات ہوئے ، اس دن کو یوم سیاہ قرار دیا جانا چاہیے

جان اللہ کو دینی ہے کہنے والے نے لوگوں کو جی ایچ کیو حملے پر اکسایا، جو قومیں محسنوں کی تکریم نہیں کرتیں وہ قومیں مٹ جاتی ہیں، قید کے اندر سے ویڈیو پیغام میں دھمکی دی کہ اگر رہا نہ کیا گیا تو دوبارہ تیار ہوجائیں،ذوالفقار علی بھٹو کو پھانسی دی گئی، محترمہ بے نظیربھٹو کی شہادت ہوئی ایسا ری ایکشن نہیں آیا،نوازشریف جعلی جے آئی ٹی اور عدالتوں کے سامنے پیش ہوتا رہا۔ پیر کو وزیر دفاع خواجہ آصف نے 9 مئی یوم سیاہ سے متعلق قرارداد قومی اسمبلی میں پیش کی جسے منظور کرلیا گیا، اراکین اسمبلی کی بڑی تعداد نے قرار داد کے حق میں ووٹ دیا۔قرار داد میں کہا گیا کہ 9 مئی کو دل دہلا دینے والے شرمناک واقعات پیش آئے، ملوث عناصر کے خلاف موجودہ قوانین کے تحت کارروائی کی جائے، ملوث عناصر، معاون، مددگاروں کیخلاف آرمی ایکٹ 1956، انسداد دہشت گردی ایکٹ اور مجموعہ ضابطہ فوجداری کے تحت کارروائی کی جائے۔قرارداد میں کہا گیا کہ 9 مئی کے واقعات سے دنیا بھر میں پاکستان کا تشخص متاثر ہوا، ایوان مسلح افواج کے ساتھ مکمل اظہار یکجہتی کرتا ہے۔ایوان میں قرارداد پڑھتے ہوئے خواجہ آصف نے کہا کہ 9 مئی کو دلخراش اور دل دہلا دینے والے واقعات ہوئے اور اس دن کو یوم سیاہ قرار دیا جانا چاہیے۔وفاقی وزیر دفاع خواجہ آصف نے ایوان میں خطاب کرتے ہوئے کہا کہ 9 مئی کے واقعات کے مقدمات ملک کے موجودہ قوانین کے تحت چلیں گے، نو مئی کے کیسز انسداد دہشتگردی ایکٹ اور آرمی ایکٹ کے تحت چلیں گے۔انہوں نے کہا کہ آڈیولیکس کمیشن دودھ کا دودھ پانی کا پانی کرنے کیلئے قائم کیا ہے، آڈیوز کی شناخت ہونے کے بعد ان کے چہرے بے نقاب ہونے چاہئیں، پی ٹی آئی نے کمیشن کو چیلنج کیا ہے،کمیشن کے ججوں پراعتراض کیاہے، جسٹس قاضی فائز عیسیٰ نے اپنے کردار کی جنگ لڑی وہ سب کے سامنے ہے۔

وزیر دفاع نے کہاکہ عمران خان نے اب تک 9 مئی کے واقعات کی واضح مذمت نہیں کی ہے، عمران خان نے یہ دھمکی بھی دی کہ دوبارہ گرفتار ہوا تو پھریہی ردعمل آئیگا۔خواجہ آصف نے کہا کہ نوازشریف اور شہبازشریف کو علم تھا کہ گرفتارہونا ہے پھر بھی ملک واپس آئے، اْنھوں نے پولیس کے ساتھ کیا کیا سلوک نہیں کیا، پولیس کے ڈی آئی جی کی آنکھ ضائع ہورہی ہے۔انہوں نے کہا کہ 9 مئی کے تناظر میں فوج کا دفاع ہم پر لازم بن جاتا ہے ،

ہمارے ائیر بیسز پر بھارت حملہ کرتا رہاہے ۔ نہوںنے کہاکہ جان اللہ کو دینی ہے کہنے والے نے لوگوں کو جی ایچ کیو حملے پر اکسایا، جو قومیں محسنوں کی تکریم نہیں کرتیں وہ قومیں مٹ جاتی ہیں۔خواجہ آصف نے کہا کہ 9 مئی کو فوجی تنصیبات ، رہائش گاہوں، ائیربیسز پر حملے کیے گئے، سیاسی دفاتر پر حملہ نہیں کیا گیا، صرف فوجی تنصیبات پر کیاگیا، ان کا یہ حملہ فوجی تنصیبات پر نہیں پاکستان پر تھا،

اس حملے کی توقعات ہندوستان سے تھیں، پاکستانیوں سے نہیں ، جن لوگوں نے اشتعال دلایا اب وہ رشتے داریاں گنوا رہے ہیں۔وزیر دفاع نے کہاکہ شہید کرنل شیر خان کا مجسمہ اکھاڑتے ہوئے کسی کو ان کی قربانی یاد نہیں آئی؟ انہوں نے ایٹمی قوت کی نشانی کو بھی آگ لگا دی، ان کے چہروں کی شناخت کریں یہ کہاں سے آئے، عمران خان کہتا ہے کہ مجھے پتہ نہیں باہر کیا ہو رہا تھا، اس کے پاس ٹیلی فون کی سہولت تھی وہ اس کو یاد تھا، لوگ اس کے کہنے پر قومی شناخت کو مسخ کررہے تھے۔

وزیردفاع خواجہ آصف نے کہا کہ عدالت کے اندر ٹیلی فون استعمال کرتا رہا، آٹھ نو دن مذمت کرنے کا انتظار کرتا رہا، پی ٹی وی اور پارلیمنٹ پر حملے میں بھی وہ ملوث تھا، قید کے اندر سے ویڈیو پیغام دیا اور دھمکی دی کہ اگر رہا نہ کیا گیا تو دوبارہ تیار ہوجائیں، کہتا ہے وہاں ایجنسیوں کے لوگ تھے، دو تو ان کی بہنیں تھیں پتہ نہیں کونسی ایجنسی کیلئے وہ کام کرتی ہیں۔خواجہ آصف نے کہا کہ اس ملک میں ذوالفقار علی بھٹو کو پھانسی دی گئی

کوئی ریاست مخالف ری ایکشن نہیں آیا، محترمہ بے نظیربھٹو کی شہادت ہوئی، ایسا ردعمل نہیں، الیکشن لڑا گیا اور پاکستان کھپے کا نعرہ لگایا گیا، میاں نواز شریف کی تین دفعہ حکومت برطرف کی گئی، نوازشریف جعلی جے آئی ٹی اور عدالتوں کے سامنے پیش ہوتا رہا، نواز شریف نے نام نہاد انصاف کے نظام کے سامنے سرجھکایا، ناانصافیاں ہوتی رہیں اور ہم برداشت کرتے رہے، عزت اور وقار والے قانون کے سامنے سرنڈر کرتے ہیں۔