کراچی (این این آئی)فاسٹ بولر محمد حسنین نے کہا ہے کہ 2020 میں ان کی ملاقات جب بالی وڈ کنگ شاہ رخ خان سے ہوئی تو انہوں پاکستان آنے کی خواہش کا اظہار کیا تھا۔ایک ڈیجیٹل انٹرویو کے دوران محمد حسنین نے 3 سال قبل شاہ رخ سے ملاقات کا قصہ بتایا کہ 2020 میں کیریبیئن پریمیئر لیگ (سی پی ایل) میں شاہ رخ خان کی ٹیم سے کھیل رہا تھا اس وقت ہمیں پتہ چلا کہ ہمارے میچز کیلئے شاہ رح خان آئیں گے تو میں بھی دیگر کھلاڑیوں کی طرح ان سے ملاقات کیلئے پرجوش تھا اور پھر جب ہم تیسرا میچ کھیلنے گئے تو شاہ رخ اس میچ کو دیکھنے آئے ہوئے تھے۔
فاسٹ بولر نے بتایا کہ میچ جیتنے کے بعد شاہ رخ خان ڈریسنگ روم میں ہم سے ملاقات کیلئے آئے تو میں بھی انھیں دیکھ کر حیران رہ گیا کہ انہیں آج تک فلموں میں اور ٹی وی پر دیکھا تھا پھر ان سے ملاقات ہوئی، اس ملاقات کے بعد شاہ رخ خان نے تین سے چار دن ہماری ٹیم کے ساتھ ہی گزارے، اس دوران ان سے کئی بار بات ہوئی، پاکستان اور بھارت پر بھی بات ہوتی تھی۔ محمد حسنین نے کہا کہ شاہ رخ نے ہی بتایاکہ وہ بھی پاکستان سے ہیں، پہلے پشاور میں رہتے تھے، اس دوران انہوں نے پاکستانیوں کی خاصی حوصلہ افزائی بھی کی اور بتایا کہ وہ پاکستان آنا چاہتے ہیں۔
