اسلام آباد (این این آئی)قومی اسمبلی نے انتخابات کیلئے 21 ارب روپے جاری کرنے کی تحریک مسترد کردی۔جمعرات کو وزیر قانون اعظم نذیر تارڑ نے ایوان میں 21 ارب روپے کے اجراء کی تحریک پیش کی۔وفاقی وزیر قانون اعظم نذیر تارڑ نیتحریک پیش کرتے ہوئے کہا کہ سپریم کورٹ نے ایک بار پھر الیکشن کیلئے 21ارب روپے جاری کرنے کا حکم دیا ہے،
کیا یہ ایوان وفاقی حکومت کو پنجاب اور کے پی الیکشنز کیلئے 21 ارب کے فنڈز جاری کرنے کیلئے ایوان میں بل پیش کرنے کی اجازت دیتا ہے؟۔قومی اسمبلی کے ایوان نے انتخابات کے لیے 21 ارب کے اجرا کی تحریک مسترد کردی۔اسپیکر قومی اسمبلی نے کہا کہ ایوان سے 21 ارب روپے کی گرانٹ پر مزید رائے لی جائے گی۔یاد رہے کہ پنجاب میں انتخابات کیلئے فنڈز کے اجرا کے حوالے سے 14 اپریل کو سپریم کورٹ نے تحریری حکم جاری کرتے ہوئے گورنر اسٹیٹ بنک کو 17 اپریل تک الیکشن کمیشن کو 21 ارب روپے کے فنڈز جاری کرنے کا حکم دیا تھا۔
