اسلام آباد(این این آئی)پاکستان تحریک انصاف کے ہیڈ آف میڈیا افیئرز اورسابق وفاقی وزیرفواد چودھری نے کہا ہے کہ سپریم کورٹ کو ان کا نا اہل کر دینا چاہیے، وزیراعظم نااہل ہو گئے تو کابینہ خود بخود ختم ہو جائے گی۔ایک انٹرویومیں نہوں نے کہا کہ آئین کے مطابق پارلیمنٹ الیکشن فنڈز نہیں روک سکتی، یہ ایک فسطائی حکومت ہے۔

انہوں نے استفسار کیا کہ کیا دنیا میں کوئی پارلیمنٹ یہ کہہ سکتی ہے کہ الیکشن نہیں ہو سکتے؟سابق وفاقی وزیر فواد چودھری نے کہا کہ منگل کو سپریم کورٹ آرڈر کرے گی پھر پتہ چلے گا کیا ہو گا؟ تاہم انہوںنے کہاکہ سپریم کورٹ نے اپنے آرڈر میں لکھ دیا تھا کہ کسی منظوری کی ضرورت نہیں۔ایک سوال کے جواب میں انہوں نے کہا گورنراسٹیٹ بینک سیدھا سیدھا توہین عدالت کے مرتکب ہوئے، سپریم کورٹ کو اپنے حکم پرعملدرآمد کروانے کیلئے ہر حد تک جانا چاہیے، تمام بار کونسلز سپریم کورٹ کے پیچھے کھڑی ہیں۔فواد چودھری نے کہا کہ حکومت مذاکرات کیلئے سنجیدہ ہی نہیں ، حکومت کو نہ ملک سے دلچسپی ہے نہ ہی اس سسٹم سے، آئین میں لکھا ہوا ہے کہ 90 د ن میں الیکشن ہونے ہیں۔فواد چودھری نے کہا کہ ہم نے سراج الحق کو بتایا ہے کہ جو بھی مذاکرات ہوں گے آئین کے اندر ہوں گے، سپریم کورٹ کے حکم پر عمل نہ ہوا تو عید کے بعد احتجاجی تحریک کیلئے تیار ہونا پڑے گا۔پی ٹی آئی کے سینئر نائب صدر فواد چودھری نے کہا کہ مذاکرات پر ہمارا کوئی مسئلہ نہیں لیکن مذاکرات آئین کے اندر ہی ہوں گے۔ انہوں نے الزام عائد کہا کہ آزاد کشمیر میں ہماری اکثریت کو اقلیت میں بدلنے کی کوشش کی جا رہی ہے۔