دمشق (این این آئی)خوفناک زلزلے کے بعد شمال مغربی شام کو آفت زدہ قرار دے دیا گیا۔امریکی میڈیا کے مطابق شام کی فلاحی تنظیم وائٹ ہیلمٹس کے ترجمان نے شمال مغربی شام کو آفت زدہ قرار دیا ہے۔امریکی میڈیا کے مطابق شام کا جنگ زدہ شہر حلب زلزلے سے متاثر ترین علاقوں میں سے ایک ہے، جہاں پر کئی عمارتیں ملبے کا ڈھیر بن گئی ہیں۔ترجمان وائٹ ہیلمٹس کے مطابق کئی خاندان ملبے کے نیچے پھنسے ہوئے ہیں۔امریکی میڈیا کے مطابق متاثرین نے کہا کہ رہنے کی کوئی جگہ نہیں، گھر تباہ ہو چکے ہیں، مزید زلزلوں سے بھی خوفزدہ ہیں۔امریکی میڈیا نے کہا کہ سرد موسم اور بارش ریسکیو کوششوں میں مشکل پیدا کر رہی ہیں، شام میں بین الاقوامی امداد پہنچنے میں بھی کچھ وقت لگ سکتا ہے۔واضح رہے کہ شام میں زلزلے سے اب تک 1 ہزار 602 اموات ہو چکی ہیں۔