کراچی (این این آئی)ڈالر کی بڑھتی قیمت کو بریک لگ گیا، کاروباری ہفتے کے پہلے روز انٹربینک میں کاروبار کے دوران لین دین5روپے57پیسے کمی سے سے 271روپے میں کیا گیا۔کاروبار کے اختتام پر ڈالر کا لین دین ایک روپے 28پیسے کمی کے بعد 275روپے 29پیسے پر بند ہوا۔جمعہ کو انٹربینک میں ڈالر کی قیمت
276روپے 57پیسے ریکارڈ کی گئی تھی۔تاہم،پیر کو اوپن مارکیٹ میں ڈالر 3روپے مہنگا نظر آیا۔ڈیلرز کے مطابق اوپن مارکیٹ میں ڈالر کی قیمت فروخت 281روپے ہے۔دوسری جانب پاکستان اسٹاک ایکسچینج میں تیزی کی لہر دیکھی گئی۔سرمایہ کاروں کی مارکیٹ میں دلچسپی کے باعث شیئرز کی خریداری کا رجحان رہا اور اکتالیس ہزار کی حد بحال ہوگئی۔کاروبار کے اختتام پر ہنڈریڈ انڈیکس 719 پوائنٹس اضافے سے 41 ہزار 190 پوائنٹس پر بند ہوا۔ بین الاقوامی بلین مارکیٹ میں فی اونس سونے کی قیمت 5 ڈالر کے اضافے سے 1870 ڈالر کی سطح پر آنے کے باوجود مقامی صرافہ مارکیٹوں میں پیر کو فی تولہ اور فی10گرام سونے کی قیمتوں میں بالترتیب 200روپے اور 172روپے کی کمی واقع ہوئی۔نتیجے میں ملک میں فی تولہ سونے کی قیمت گھٹ کر دو لاکھ 4 ہزار 300 روپے اور فی دس گرام قیمت ایک لاکھ 75 ہزار 154 روپے کی سطح پر آگئی۔اس کے برعکس فی تولہ چاندی کی قیمت بغیر کسی تبدیلی کے 2250 روپے اور دس گرام چاندی کی قیمت بھی بغیر کسی تبدیلی کے 1929 روپے کی سطح پر مستحکم رہی۔
