اسلام آباد (این این آئی)نیپرا نے کراچی کیلئے بجلی سات روپے تینتالیس پیسے سستی ،سرکاری ڈسکوز کے صارفین کیلئے ایک ماہ کیلئے قیمت میں انیس پیسے فی یونٹ اضافے کا فیصلہ کرلیا ،قیمتوں میں کمی اور اضافے کا اطلاق ایک ماہ کیلئے ہوگا

تفصیلات کے مطابق کے الیکٹرک کیلئے بجلی کی قیمتوں میں سات روپے تینتالیس پیسے کی کمی جبکہ ڈسکوز صارفین کیلئے انیس پیسے مہنگی کر دی گئی۔نیپرا اتھارٹی کی جانب سے جاری نوٹیفکیشن کے مطابق کراچی کے بجلی صارفین کیلئے قیمتوں میں کمی نومبر 2022 کے ایف سی اے کی مد میں کی گئی جبکہ کے الیکٹرک نے 7روپے 04 پیسے فی یونٹ کمی کی درخواست کی تھی،سرکاری ڈسکوز صارفین کیلئے قیمت میں اضافہ بھی نومبر کے ایف سی اے کی مد میں کیا گیا اور سینٹرل پرچیزنگ پاور ایجنسی نے20 پیسے فی یونٹ اضافے کی درخواست کی تھی۔کے الیکٹرک اور سرکاری ڈسکوز کی الگ الگ درخواستوں پر نیپرا نے گزشتہ ماہ 27 دسمبر کو سماعت کی تھی قیمتوں میں کمی اور اضافے کا اطلاق سرکاری ڈسکوز اور کے الیکٹرک صارفین کیلئے ماہ جنوری کے بلوں پر ہوگا ،کے الیکٹرک کے لائف لائن صارفین،تین سو یونٹس تک گھریلو، زرعی اور الیکٹرک وہیکل چارجنگ اسٹیشنز پر نہیں ہوگا۔