اسلام آباد(مانیٹرنگ ڈیسک) عمران خان اور عائلہ ملک کی مبینہ آڈیو کال لیک ہونے کے معاملہ پر سابق رکن قومی اسمبلی سمیرا ملک بھی اپنی بہن عائلہ ملک کے دفاع کیلئے میدان میں آ گئیں۔روزنامہ جنگ میں عاطف شیرازی کی خبر کے مطابق سمیرا ملک نے اپنے ٹویٹس میں کہا ہے کہ میری بہن عائلہ ملک کے متعلق
ریلیز کی گئی جعلی آڈیوز کی سختی سے مذمت کرتی ہوں اور سپریم کورٹ سے سخت نوٹس لینے کا مطالبہ کرتی ہوں۔انہوں نے کہا ہے کہ جعلی آڈیوز اور ویڈیوز کا یہ دھندہ اب بند ہو جانا چاہیے نہیں تو عزت کسی گھر کی نہیں بچے گی۔ انہوں نے کہا ہے کہ حقیقت تو یہ ہے عوام اس حکومت سے تنگ آ چکے ہیں جسکی وجہ سے حکومت نے عوام کی توجہ ہٹانے کے لیے آڈیوز ویڈیوز کا مکروہ دھندہ شروع کر دیا ہے۔عائلہ ملک نے مبینہ آڈیو کال لیک ہونے پرکہا ہے کہ جس طرح میری جعلی آڈیوز ریلیز کی گئی ہیں اس طرح اگر مریم نواز کی اصل آ گئیں تو کیا ہو گا ؟انہوں نے سماجی رابطہ کی ویب سائٹ پہ عمران خان کیساتھ لیک ہونے والی آڈیو کال کا ملبہ ن لیگ پہ ڈالتے ہوئے کہا ہے کہ ماضی میں مسلم لیگ ن کی طرف سے میری بہن سمیرا ملک پر بھی گھٹیا اور بھونڈے الزامات لگائے گئے۔
