لاہور ( این این آئی) پیپلز پارٹی وسطی پنجاب کے قائمقام صدر رانا فاروق سعید نے اعتزاز احسن کی رکنیت معطلی کی سفارش پارٹی قیادت کو بھجوانے کا اعلان کرتے ہوئے واضح کیا ہے کہ کوئی فیصلہ نہ لیا گیا تو اعتزاز کے گھر کا گھیرائو بھی کرینگے ،پارٹی کارکنوں میں شدید غم و غصہ ہے،پیپلز پارٹی میں بیٹھ کر عمران خان کا مقدمہ لڑنے والے کو برداشت نہیں کر سکتے ۔
ان خیالات کا اظہار انہوں نے گزشتہ روز پریس کانفرنس کے دوران کیا ۔اس موقع پر ثمینہ گھرکی، رانا جواد، فیصل میر،حاجی عزیز الرحمن چن،افنان بٹ ،اورنگزیب برکی،عدنان گورسی،عمران اٹھوال نرگس خان،شاہد عباس،رضا شاہ،شاہدہ جبیں،مسرت صدیقی اور دیگر بھی موجود تھے ۔زونل صدرپی پی 163حاجی شعیب اور زونل صدر پی پی 158نصیر خان نے سفارش کی ہے کہ اعتزاز احسن کی بنیادی رکنیت ختم کی جائے ۔فیصل میر نے اجلاس میں منظور کردہ قرار داد پڑھ کر سنائی۔جس پر رانا فاروق نے کہا کہ کارکنوں کی پاس کردہ متفقہ قرار داد اپنی سفارش کیساتھ سینٹرل ایگزیکٹو کمیٹی کو بھیجیں گے۔چیئرمین پارٹی سے کہتا ہوں کہ بھٹو سے غداری کرنیوالے کی پارٹی میں کوئی گنجائش نہیں،اعتزاز احسن کی رکنیت معطل نہ کی تو اسکے گھر کا گھیرائو بھی کر سکتے ہیں ،امید ہے قیادت ہماری سفارشات پر فوری ایکشن لیگی۔انہوں نے کہا کہ اعتزاز احسن کا سیاسی سفر مفاد اور محاذ آرائی پر مبنی ہے،پیپلز پارٹی میں بیٹھ کر عمران کا مقدمہ لڑنے والے کو برداشت نہیں کرینگے، افتخار چودھری کے ڈرائیور کی ڈبل گیم نہیں چلنے دینگے۔پیپلز پارٹی کی پلیٹ میں چھید کرنیوالے کیخلاف پارٹی کارکنوں میں شدید غم و غصہ ہے۔انہوں نے کہا کہ اعتزاز احسن وزیر پہلے بنے،ایم پی اے1977ء میں بنے،حامد سرفراز کو کہا تھا کہ ضیاء کبھی بھی اصغر خان کو وزیر اعظم نہیں بنائے گا، یہ اس وقت پارٹی چھوڑ کر چھلانگ لگا کر وہاں چلا گیا ۔86 میں یہ واپس آیا اور93 میں سینٹر بنا،یہ سفارشی وزیر اعظم بننا چاہتا تھا۔
کل تک نواز شریف کا بھائی کہنے والا آج اسے برا بھلا کہہ رہا ہے،سازشوں کے باوجود پارٹی نے اسے دوبار سینٹر بنایا۔اعتزاز نے جتنا نقصان 2008ء سے 2013ء تک پاکستان کا کیا کسی نے نہیں کیا۔اعتزاز احسن کو فوری طور پر سینٹرل ایگزیکٹو اورپارٹی سے نکالنے کی متفقہ قرار داد
چیئرمین پیپلز پارٹی بلاول بھٹو زرداری کو بھیج رہے ہیں ۔ رانا فاروق سعید نے کہا کہ جنرل سیکرٹری اسلام آباد میں مصروف ہیں مگر وسطی پنجاب کی تمام قیادت ساتھ ہے، مجھ پر کارکنوں کا پریشر ہے،میں صرف قیادت تک ورکرز کی آواز پہنچا رہا ہوں۔پارٹی قیادت نے ا عتزاز احسن کے مستقبل کا آخری فیصلہ کرنا ہے۔
