اسلام آباد (نیوز ڈیسک)اداکارہ ہنسیکا موٹوانی اور ان کے شوہر سہیل کتھوریہ کے درمیان مبینہ اختلافات اور علیحدگی کی خبریں بھارتی میڈیا میں گردش کر رہی ہیں، تاہم دونوں کی جانب سے تاحال اس بارے میں کوئی باضابطہ بیان سامنے نہیں آیا۔میڈیا رپورٹس کے مطابق، ہنسیکا اور سہیل نے 2022 میں شادی کی تھی، لیکن محض دو برس بعد اب یہ دعویٰ سامنے آ رہا ہے کہ دونوں نے علیحدہ رہنا شروع کر دیا ہے۔ اطلاعات ہیں کہ ہنسیکا اس وقت اپنی والدہ کے ساتھ رہائش پذیر ہیں جبکہ سہیل اپنے والدین کے ہمراہ مقیم ہیں۔رپورٹ کے مطابق، شادی کے بعد اداکارہ اپنے سسرال میں مقیم تھیں، تاہم گھر کے محدود اسپیس اور بڑے خاندان کے باعث انہیں مشکلات کا سامنا تھا، جس کے بعد دونوں نے اسی عمارت میں ایک الگ فلیٹ کرائے پر لے لیا تھا۔

علیحدہ رہائش کے باوجود ان کے درمیان اختلافات برقرار رہے، جس کے نتیجے میں بظاہر دونوں نے علیحدگی کا فیصلہ کیا۔جب بھارتی میڈیا نے سہیل سے رابطہ کیا تو انہوں نے ان خبروں کو بے بنیاد قرار دیتے ہوئے مسترد کر دیا، تاہم ہنسیکا نے ان قیاس آرائیوں پر کسی قسم کا تبصرہ کرنے سے گریز کیا ہے۔سوشل میڈیا پر اس جوڑی کی علیحدگی کی خبروں پر صارفین کی جانب سے ملے جلے ردعمل دیکھنے میں آئے ہیں۔ کئی صارفین کا کہنا ہے کہ ہنسیکا نے اپنی قریبی دوست رِنکی بجاج کو دھوکہ دے کر اُس کے شوہر سہیل سے تعلق قائم کیا اور بعد ازاں شادی کی۔پنک ولا کی رپورٹ کے مطابق ہنسیکا نے اپنے انسٹاگرام اکاؤنٹ سے شادی کی تمام تصاویر اور پوسٹس ڈیلیٹ کر دی ہیں، جس کے بعد ان افواہوں کو مزید تقویت ملی۔

یہ بھی یاد رہے کہ اداکارہ کو سہیل اور رِنکی کی شادی کی تقریب میں ڈانس کرتے ہوئے بھی دیکھا گیا تھا، جس کے بعد سہیل سے منگنی اور شادی کے اعلان پر صارفین نے انہیں تنقید کا نشانہ بنایا تھا۔اس حوالے سے ماضی میں اداکارہ نے ایک انٹرویو میں وضاحت دیتے ہوئے کہا تھا کہ صرف کسی کو جاننے کا مطلب یہ نہیں کہ آپ ہی غلط ہیں۔ اُن کا کہنا تھا کہ رِنکی اور سہیل کے رشتے کے خاتمے سے ان کا کوئی تعلق نہیں تھا۔ ہنسیکا نے کہا کہ بطور مشہور شخصیت، لوگوں کے لیے مجھے قصوروار ٹھہرانا آسان ہوتا ہے، اور یہ شہرت کی ایک قیمت ہے جو انہیں ادا کرنی پڑتی ہے۔