لاہو ر(این این آئی) لیسکو میں بوگس ڈی ٹیکشن بلز کی بنیاد پر صارفین کیساتھ کروڑوں روپے کے فراڈ کا انکشاف ہونے پر کمپنی نے تین کروڑ روپے سے زائد کی جعلی بلنگ کرنے پر ڈائریکٹر کسٹمر سروسز اور ایکسیئن باغبانپورہ ڈویژن کیخلاف انکوائری شروع کردی۔
نجی ٹی وی کے مطابق لیسکو عملہ نے جعلی ڈی ٹیکشن بلز کی بنیاد پر صارفین سے بجلی چوری کے الزام میں تین کروڑ روپے سے زائد چارج کئے گئے۔ صارفین کو تین ماہ کے دوران ایک کروڑ ساٹھ لاکھ یونٹس جعلی طریقے سے چارج کئے گئے، جعلی بلنگ کرنے پر ڈائریکٹر کسٹمر سروسز رائے اصغر کیخلاف تحقیقات کا آغاز کر دیا گیا ہے جبکہ باغبانپورہ ڈویژن کے سابق ایکسیئن رب یار کیخلاف بھی انکوائری کی جا رہی ہے۔ کمپنی نے بجلی چوری کو چھپانے کیلئے صارفین کو جعلی ڈی ٹیکشن بل چارج کئے گئے۔گزشتہ سال جولائی میں ایک کروڑ تینتیس لاکھ روپے کی بوگس بلنگ کی گئی جبکہ گزشتہ سال ماہ اگست میں اکہتر لاکھ روپے کے جعلی ڈی ٹیکشن بال چارج کئے گئے، اسی طرح رواں سال اپریل میں 96 لاکھ روپے سے زائد کی بوگس بلنگ کی گئی، ذرائع نے بتایا کہ جعلی ڈی ٹیکشن بل چارج کرکے لیسکو کے لائن لاسز کو مرتب کیا گیا جس پر سیکرٹری پاور ڈویژن راشد لنگڑیال نے لیسکو کے نتائج پر تحفظات کا بھی اظہار کیا تھا۔
