راولپنڈی(آن لائن)چیرمین تحریک انصاف و سابق وزیراعظم عمران خان نے کہاکہ ہم عدلیہ اوراداروں کا احترام کرتے ہیں، عدلیہ جب بھی بلائے گی ضرور پیش ہونگے ،موجودہ حکومت عوام کی پرواہ کیے بغیر پٹرولیم قیمتیںبڑھاتی جارہی ہے جو عوام کی قوت برداشت سے باہر ہورہی ہیں ،بہت جلد عوام باہر نکل کراس حکومت کواٹھا کرباہر پھینک دیں گے۔
ان خیالات کا اظہار انہوں نے پاکستان مسلم لیگ( زیڈ) کے سربراہ سابق وفاقی وزیرمحمداعجازالحق کی سربراہی میں وفد سے ملاقات میں کیا ۔ اعجاز الحق اور انکے وفد نے چشتیاں میں 11ستمبر کوہونیوالے ضمنی الیکشن میں تحریک انصاف کے امیدوار کی بھرپور حمایت کااعلان کیا۔ ملاقات میں اعجازالحق کے ہمراہ سردارسمیع خان اور لاہورہائیکورٹ بار کے سابق صدر شفقت چوہان بھی موجودتھے۔ عمران خان نے کہاکہ ہم عدلیہ اوراداروں کابہت احترام کرتے ہیں، عدلیہ جب بھی ہمیں بلائے گی توہم ضرور پیش ہونگے۔ انہوں نے کہاکہ موجودہ حکمرانوں کی نااہلی اورکرپشن کے باعث مہنگائی اوربیروزگاری روزبروز بڑھ رہی ہے، عالمی منڈی میں تیل کی قیمتیں کم ہورہی ہیں اورموجودہ حکومت عوام کی پرواہ کیے بغیر پٹرولیم مصنوعات کی قیمتیںبڑھاتی جارہی ہے جو کہ عوام قوت برداشت سے باہر ہورہی ہیں اوربہت جلد عوام باہر نکل کراس حکومت کواٹھا کرباہر پھینک دیں گے۔ عمران خان نے کہاکہ پی ٹی آئی کی دن بدن بڑھتی ہوئی مقبولیت اس بات کی عکاسی کرتی ہے کہ عوام میں شعور بیدار ہوچکاہے اور اسی لیے عام آدمی ان چوروں اورلٹیروں کیخلاف اٹھ کھڑا ہوا ہے۔ اس موقع پر اعجازالحق نے کہاکہ ہم 7ستمبر کو چشتیاں میں پی ٹی آئی کے جلسے کوبھرپور کامیاب بنائیں گے اورانشاء اللہ 11 ستمبر کو چشتیاں میں ہمارا حمایت یافتہ پی ٹی آئی امیدوار بھاری اکثریت سے کامیاب ہوگا۔
