لاہور( آن لائن) مسلم لیگ (ق) کے سربراہ چوہدری شجاعت حسین نے اپنے بھائی وجاہت حسین کو جھوٹا اور بیٹوں پرڈالر مانگنے کا الزام بیہودہ قرار دیدیا۔چودھری شجاعت حسین نے اپنے بھائی وجاہت حسین کی تقریر پر ردعمل دیتے ان کے بیان کو بے ہودہ قرار دے دیا۔
شجاعت حسین نے کہا کہ میرے چھوٹے بھائی وجاہت حسین نے ہمارے گھر گجرات میں لوگوں سے چند باتیں کی ہیں، قومی سطح کے ایک بڑے لیڈر آصف زرداری کے متعلق الزام تراشی کی ہے اور میرے بیٹوں پر الزام لگایا ہے کہ انہوں نے ڈالر مانگے۔چوہدری شجاعت نے کہا کہ میں نے اپنے بیٹوں کی ایسی تربیت نہیں کی، میرے کہنے پر میرے بچے فی الحال خاموش ہیں، میں نے انہیں تلقین کی ہوئی ہے کہ ہمیشہ سچ بولنا ہے اور وعدے کا پاس رکھنا ہے، میرے کہنے پر ہی اپوزیشن کے متفقہ امیدوار وزیراعظم شہباز شریف کو ووٹ ڈالا گیا، ہم نے کسی سے کوئی وزارت نہیں مانگی آصف علی زرداری نے بھی خود آکر ہمیں مبارک باد دی تھی۔ چودھری وجاہت حسین کے نئی جماعت بنانے پر انہوں نے کہا کہ سیکڑوں پارٹیاں بنی ہوئی ہیں ایک اور بن جائے گی تو کیا فرق پڑے گا۔چودھری شجاعت حسین نے کہا کہ چودھری وجاہت نے طارق بشیر چیمہ کے متعلق جوکہا ہے وہ غیر اخلاقی اور جھوٹ پر مبنی ہے، میں وجاہت حسین کی باتوں کا جواب کسی وقت گجرات جا کر گجرات والوں کے سامنے دوں گا، چودھری وجاہت حسین کو بتاؤں گا کہ کس کا کون سا حلقہ ہے؟
