لاہور، اسلام آباد(این این آئی)تحریک انصاف کے چیئرمین عمران خان نے ضمنی انتخاب کا محاذ مضبوط کرنے کیلئے اتوار کو لاہور کے دورے کا فیصلہ کیا ہے، وہ لاہور میں جلسے اور ورکرز کنونشن سے خطاب کریں گے۔عمران خان ایک روزہ دور ے پر اتوار کے روز لاہور آئیں گے۔
وہ اتوار کو ضمنی انتخاب کے حوالے سے لاہور میں ورکرز کنونشن سے خطاب کریں گے، ورکرز کنونشن میں لاہور کے چاروں ضمنی انتخاب کے حلقوں کے ورکرز شریک ہوں گے۔عمران خان ضمنی انتخاب کے سلسلے میں لاہور میں دو جلسوں سے بھی خطاب کریں گے۔ عمران خان لاہور میں ضمنی انتخاب میں پارٹی امیدواروں کی کامیابی کے لئے اجلاسوں کی صدارت بھی کریں گے۔دوسری جانب چیف الیکشن کمشنر سکندر سلطان راجہ نے پولنگ افسران کو ہدایت کی ہے کہ پنجاب کے 20 حلقوں میں ضمنی انتخابات کے سلسلے میں کسی قسم کا دبائو خاطر میں نہ لائیں۔17 جولائی کو پنجاب کے 20 حلقوں میں ہونے والے ضمنی انتخابات کے معاملے پر چیف الیکشن کمشنر سکندر سلطان راجہ نے متعلقہ پولنگ افسران کو ٹیلی فونک رابطے کے دوران یہ ہدایت کی ۔انہوںنے کہاکہ افسران پنجاب کے 20 حلقوں میں ضمنی انتخابات شفاف اور غیر جانبدارانہ بنانے کی ہر ممکن کوشش کریں۔چیف الیکشن کمشنر سکندر سلطان راجہ نے ہدایت کی کہ پولنگ میں رکاوٹ ڈالنے والے عناصر کے خلاف بلا امتیاز قانونی کارروائی کی جائے۔انہوں نے کہا کہ ڈسٹرکٹ مانیٹرنگ ٹیمیں صورتِ حال کی لمحہ بہ لمحہ رپورٹ الیکشن کمیشن کو بھجوائیں۔چیف الیکشن کمشنر سکندر سلطان راجہ نے ڈسٹرکٹ مانیٹرنگ آفیسرز کو چوکنا رہنے اور ضابطہ اخلاق کی خلاف ورزی پر فوری ایکشن لینے کا حکم بھی دیا ہے۔
