اسلام آباد(این این آئی)سول ایوی ایشن اتھارٹی (سی اے اے) کے ملازم نے ادارے کے سربراہ کو خط لکھ کر درخواست کی ہے کہ پیٹرول کی قیمت میں اضافے کی وجہ سے انہیں کام پر آنے کے لیے گدھا گاڑی لانے کی اجازت دی جائے۔میڈیارپورٹ کے مطابق سی اے اے کے

ملازم نے اپنے خط میں لکھا کہ حکومت کی طرف سے پیٹرولیم مصنوعات کی قیمتوں میں حالیہ اضافے کے بعد وہ اپنا ذاتی ٹرانسپورٹ استعمال کرنے سے قاصر ہیں۔سی اے اے کے ڈائریکٹر جنرل کو لکھے گئے خط میں راجا آصف اقبال نامی ملازم نے لکھا ہے کہ وہ 25 برسوں سے ادارے میں خدمات سرانجام دے رہے ہیں اور اس وقت اسلام آباد انٹرنیشنل ایئرپورٹ پر کام کر رہے ہیں۔انہوں نے لکھا کہ ملک میں بڑھتی ہوئی مہنگائی نے نہ صرف غریب طبقے کی کمر توڑ دی ہے بلکہ اب متوسط طبقہ بھی متاثر ہورہا ہے۔انہوں نے درخواست میں سی اے اے کی پارکنگ میں انہیں گدھا گاڑی لانے کی اجازت طلب کرتے ہوئے کہا کہ اس مہنگائی میں ادارے نے ٹرانسپورٹ سروس کی سہولیات ختم کردی ہیں اس لیے پیٹرول کی بڑھتی قیمتوں کی وجہ سے ذاتی ٹرانسورٹ استعمال کرنا ناممکن ہوگیا ہے۔ملازم نے خط میں گزارش کرتے ہوئے لکھا کہ مہربانی کرکے مجھے ایئرپورٹ پر گدھا گاڑی لانے کی اجازت دی جائے۔سی اے اے کے ترجمان سیف اللہ خان نے نجی ٹی وی کو بتایا کہ عملے کے ہر ملازم کو فیول الاؤنس دیا جاتا ہے، انہوں نے پِک اینڈ ڈراپ سروس کے ختم ہونے پر بھی ملازم سے اختلاف کیا۔ترجمان نے کہا کہ ملازمین کو پک اینڈ ڈراپ سروس فراہم کی جاتی ہے اور ملازمین کے لیے میٹرو بس سروس بھی ایئر پورٹ پر موجود ہے۔انہوں نے کہا کہ ملازم کی ایسی درخواست کا مقصد میڈیا کہ توجہ حاصل کرنے کے علاوہ کچھ نہیں ہے۔واضح رہے کہ حکومت نے گزشتہ روز پیٹرولیم مصنوعات کی قیمتوں میں مزید 30 روپے فی لیٹر اضافہ کردیا تھا جس کا اطلاق رات سے ہوگیا ہے۔